Lestin brunar

Lestin brunar
Lag / erlent lag [1] Gylfi Þ. Gíslason [2] Árni Johnsen [3] / Jón Helgason

Lestin brunar hraðar, hraðar,
húmið ljósrák sker,
bráðum ert þú einhvers staðar
óralangt frá mér.

Út í heim þú ferð að finna
frama nýjan þar,
ég hverf inn til anna minna,
allt er líkt og var.

Þú átt blóðsins heita hraða,
hugarleiftur kvik:
auðlegð mín er útskersblaða
aldagamalt ryk.

Einhvers skýrra, einhvers blárra
æskti hugur minn,
og þú dreifðir daga grárra
deyfð og þunga um sinn.

En nú liggja leiðir sundur,
ljósin blika köld,
aldrei verður okkar fundur
eftir þetta kvöld.

Gegnum haustsins húmið þétta
hugur minn víða ber,
aldrei muntu af því frétta
að hann fylgir þér.

Allar raddi óma glaðar,
einn ég raula mér,
lestin brunar hraðar, hraðar,
húmið ljósrák sker.

[þrjú mismunandi lög eru til við þennan texta]
[m.a. á plötunni Róbert Arnfinnsson – Lestin brunar]