Afmælisbörn 26. maí 2020

Vilberg Vilbergsson (Villi Valli)

Fjögur afmælisbörn eru á skrá Glatkistunnar í dag:

Villi Valli (Vilberg Vilbergsson) hárskeri og tónlistarmaður á Ísafirði á stórafmæli en hann er níræður á þessum ágæta degi. Villi Valli, sem upphaflega kemur reyndar frá Flateyri, var mikill djassvakningarmaður á Vestfjörðum og starfrækti margar sveitir sem sérhæfðu sig í þeirri tegund tónlistar, meðal sveita sem hann lék með og starfrækti voru Hljómsveit Vilbergs Vilbergssonar, VV kvartett, Villi, Gunnar og Haukur, M.G. tríó og S.V.O. tríóið en einnig stjórnaði hann Lúðrasveit Ísafjarðar svo annars konar dæmi séu tekin. Tvær plötur hafa komið út með Villa Valla.

Ólafur Sigurðsson trommuleikari á einnig stórafmæli, hann er sjötugur í dag en hann lék með mörgum þekktum hljómsveitum hér fyrrum. Meðal sveita sem hann gerði garðinn frægan með má nefna Pops, Zoo, Rosie, Tatara, Tilveru, Eik, Kamarorghesta og Pelican.

Þór Nielsen er sjötíu og níu ára gamall í dag, hann hefur sungið og leikið á gítar með fjölda hljómsveita og þeirra á meðal má nefna sveitir eins og J.J. quintet, Junior kvintett, Tígris sextettinn, Pónik, Venus kvartettinn, Þórsmenn, City sextett, Ásar, Glæsir, Flamingo kvartetttinn og Tríó Elfars Berg svo aðeins hluti þeirra sé hér upptalinn.

Viðar Alfreðsson horn- og trompetleikari (f. 1936) hefði líka átt afmæli þennan dag. Viðar lék með mörgum þekktum danshljómsveitum hér fyrrum s.s. Hljómsveit Svavars Gests og Hljómsveit Björns R. Einarssonar, og einnig á mörgum plötum allt þar til hann lést árið 1999. Ein plata leit dagsins ljós með Viðari, hún kom út árið 1980 og hét Viðar Alfreðsson spilar og spilar.