Tónleikar á vegum Jazzfjelags Suðurnesjabæjar

Sigmar Þór Matthíasson og félagar

Jazzfjelag Suðurnesjabæjar stendur fyrir tónleikum í kvöld, 1. október í Bókasafni Sandgerðis við Skólastræti og hefjast þeir klukkan 20:00.

Það er bassaleikarinn Sigmar Þór Matthíasson sem er miðpunktur tónleikanna, hann gaf út sína fyrstu sólóplötu, Áróru í september 2018 en hún hlaut tvær tilnefningar til Íslensku Tónlistarverðlaunanna í flokki jazz- og blústónlistar á síðasta ári.

Nú er hafinn undirbúningur fyrir aðra plötu, sem ber vinnuheitið METAPHOR, og er áætluð útgáfa hennar snemma árs 2021. Hér er um að ræða nýtt frumsamið efni þar sem áhrif frá austrænni þjóðlagatónlist og annarri heimstónlist blandast við nútímajazz, áður en haldið verður í hljóðver munu Sigmar og félagar prufukeyra nýja efnið á tónleikunum í kvöld. Hér er um einstakt tækifæri að ræða þar sem heyra má nýja óútgefna tónlist í stöðugri mótun.

Hljómsveitina skipa auk Sigmars á kontrabassa, þeir Haukur Gröndal á klarinett og saxófón, Ásgeir Ásgeirsson á oud og önnur strengjahljóðfæri, Ingi Bjarni Skúlason á píanó og Matthías Hemstock á trommur.

Hér má sjá frekari upplýsingar um viðburðinn á Facebook-síðu Jazzfjelags Suðurnesjarbæjar og hér má heyra tóndæmi: 

Aðgangur á tónleikana er ókeypis en minnt er á sóttvarnarreglur og takmarkaðan fjölda gesta.