Jóhann Jóhannsson – Karolina fund söfnun

Jóhann Jóhannsson

Eins og fram hefur komið hefur verið unnið að heimildamynd um Jóhann Jóhannsson tónlistarmanns sem lést langt fyrir aldur fram í febrúar 2018. Það eru þeir Davíð Hörgdal Stefánsson og Orri Jónsson (auk Eyju Orradóttur) sem hafa haft veg og vanda að verkinu og samhliða því og rannsóknarvinnu um tveggja ára skeið hafa þeir félagar unnið að bók um Jóhann sem nú er langt komin í vinnslu en framundan er lokahnykkur þessa umfangsmikla verkefnis.

Kvikmyndamiðstöð Íslands hefur fjármagnað framleiðslu heimildamyndarinnar að hluta til en til að unnt reynist að ljúka bókverkinu hefur verið sett á fót söfnun á Karolina Fund til að mæta kostnaði við þá rannsóknarvinnu og úrvinnslu hennar sem hefur reynst bróðurpartur vinnunnar.

Hugmyndir þeirra félaga eru metnaðarfullar og útkoman verður glæsileg, lífleg og óvenjuleg bók full af skemmtilegu og fræðandi efni um Jóhann og þá íslensku tónlistarsenu sem hann spratt úr á níunda og tíunda áratug liðinnar aldar. Fjármögnunin á Karolina Fund leggur áherslu á forsölu á 1. útgáfu bókarinnar – og rannsóknarvinnuna fyrir hana en mun einnig gagnast við vinnslu heimildamyndarinnar og tryggja að ævi og listferli Jóhanns verði gerð almennileg skil.

Nú styttist í að söfnun þeirra Davíðs og Orra á Karolina Fund ljúki en aðeins eru fáeinir dagar til stefnu (7. júlí), vel gengur að safna og góðar líkur eru á að markmið náist en ennþá vantar upp á. Hér er tengill á söfnunina og eru allir hvattir til að leggja þessu verðuga verkefni lið. Hér má sjá glefsur frá rannsóknarvinnu þeirra félaga og hér má svo sjá glefsur frá ferli Jóhanns.