Afmælisbörn 1. nóvember 2021

Guðmundur Finnbjörnsson

Afmælisbörn dagsins hjá Glatkistunni að þessu sinni eru sjö talsins:

Jón Sigurbjörnsson söngvari, leikari og hestamaður er níutíu og níu ára í dag. Jón nam leiklist í Bandaríkjunum og samhliða því lærði hann söng. Hann hélt áfram söngnámi á Ítalíu og hér heima en vann þó fyrst og fremst í leiklistinni. Söng hans má heyra á fjölmörgum plötum, mörgum  með tónlist úr leikhúsinu en einnig þar sem han syngur t.a.m. einsöng með Karlakór Reykjavíkur. Tvær sólóplötur hafa komið út með Jóni.

Sagnfræðingurinn Davíð Ólafsson á stórafmæli en hann er fimmtugur á þessum degi. Davíð er bassa- og gítarleikari hljómsveitarinnar Sagtmóðigur sem hefur sent frá sér fjölda platna frá því snemma á tíunda áratug síðustu aldar.

Arthur (Ross) Moon bassaleikari er sjötíu og átta ára gamall. Arthur var lengst af bassaleikari Lúdó og Stefáns en lék einnig með hljómsveitum eins og Falcon og Rondó tríó auk þess að starfrækja eigin sveit um tíma, Tríó Arthurs Moon.

Vilhjálmur Goði Friðriksson Brekkan söngvari og gítarleikari er fjörutíu og níu ára gamall. Hann var á sínum tíma í hljómsveitum eins og Bleeding Volcano, Tríói Jóns Leifssonar, Buffi, Todmobile, Kizz o.fl. og kom einnig við sögu á sviði í söngleikjum s.s. Súperstar, Hárinu og Grease. Hann hefur hin síðari ár starfað við ferðaþjónustu.

Þá er gítarleikarinn Kristján (Ólafur) Grétarsson fjörutíu og fjögurra ára gamall í dag. Hann er sonur Grétars Örvarssonar og hefur m.a. leikið í hljómsveit hans, Stjórninni en einnig hefur hann leikið með sveitum eins og The Flavour, Ísafold, Englum, BSG og Elektru. Þá hefur hann leikið inn á fjölda platna hjá tónlistarfólki eins og Nylon, Örvari Kristjánssyni, Björgvini Halldórssyni, Halla Melló, Jóhanni Ásmundssyni og mörgum öðrum.

Ólafur Guðmundsson (f. 1952) söngvari og gítarleikari BG & Ingibjargar frá Ísafirði hefði ennfremur átt afmæli þennan dag en hann lést árið 1986 einungis þrjátíu og fjögurra ára gamall. Ólafur var einnig fyrsti söngvari hljómsveitarinnar Grafíkur.

Þá er hér að síðustu nefndur saxófón- og fiðluleikarinn Guðmundur (Ólafur) Finnbjörnsson (fæddur 1923) en hann rak hljómsveit í eigin nafni um langt árabil, þá lék hann einnig með hljómsveitum eins og Sextett Steinþórs Steingrímssonar, Hljómsveit Björns R. Einarssonar, Hljómsveit Baldurs Kristjánssonar og Hljómsveit Svavars Gests. Guðmundur lést 2009.

Vissir þú að árið 1939 var Sköpunin e. Haydn flutt í Bifreiðaskála Steindórs að viðstöddum um 2000 áhorfendum?