Gamla gatan

Gamla gatan
(Lag / texti: Oddgeir Kristjánsson / Ástgeir Ólafsson (Ási í Bæ))

Ó, gamla gatan mín,
ég glaður vitja þín
og horfnar stundir heilsa mér.
Hér gekk ég gullin spor
mín góðu bernskuvor
sem liðu burt í leik hjá þér.

Í sól og sumaryl,
hve sælt að vera til,
við þekktum hvorki boð né bann,
en kveiktum ástareld
sem öll hin rauðu kveld
í ungum hjörtum okkar brann.

Dagarnir hurfu með draumsins þyt,
dóu mín sumarblóm.
Nú geymi ég þeirra ljós og lit
sem lifandi helgidóm.

Það berast ómar inn,
ég opna gluggann minn
og um mig leikur andi hlýr,
því æskan framhjá fer,
til fundar hraðar sér
að yrkja lífsins ævintýr.

[m.a. á plötunni Sextett Ólafs Gauks, Svanhildur og Rúnar – Fjórtán lög frá Þjóðhátíð Vestmannaeyja eftir Oddgeir Kristjánsson]