Afmælisbörn 8. mars 2022

Sigríður Helgadóttir

Þrjú tónlistartengd afmælisbörn eru í gagnabanka Glatkistunnar í dag:

Karl Hermannsson söngvari úr Keflavík er sjötíu og sjö ára gamall á þessum degi en hann fæddist 1945. Fyrsta hljómsveit hans mun líklega hafa verið Skuggar en einnig var hann söngvari um tíma í Hljómum. Söngferil sinn lagði Karl að mestu á hilluna en söng hans má þó heyra á plötunni Hemmi Gunn og Rúnni Júl syngja fyrir börnin og Keflavíkurplötunum ÍBK og Keflavíkurhraðlestin.

Erling Blöndal Bengtsson sellóleikari (f. 1932) hefði einnig átt afmæli á þessum degi en hann lést 2013. Hann varð snemma efnilegur á sellóinu og kom fram á tónleikum aðeins fjögurra ára gamall, hann varð síðar virtur í klassíska geira tónlistarinnar og lék með mörgum af fremstu sinfóníuhljómsveitum heimsins. Nokkrar 78 snúninga plötur með sellóleik Erlings komu út á fyrri hluta sjötta áratugarins og í seinni tíð hafa fjölmargar plötur komið út með honum, einnig er hægt að heyra leik hans á plötum með Kammersveit Reykjavíkur og Sinfóníuhljómsveit Íslands.

Svo er hér að síðustu nefnd Sigríður Helgadótir en margir þekkja nafn hennar í tengslum við plötuútgáfu og verslanarekstur. Sigríður (f. 1903) rak verslanir sem seldu m.a. hatta, hljóðfæri og hljómplötur en Hljóðfæraverslun Sigríðar Helgadóttur í Vesturveri (við Ingólfstorg) er þeirra þekktust, hún rak jafnframt hljómplötuútgáfu í eigin nafni og mun hafa verið fyrst hérlendis til að gefa út 45 snúninga plötur. Sigríður lést 1954.

Vissir þú að Laddi og Valgeir Guðjónsson unnu saman að laginu Gerum okkar besta fyrir HSÍ árið 1988?