Afmælisbörn 15. ágúst 2022

Sigríður Anna Þorgrímsdóttir

Fimm tónlistartengd afmælisbörn eru á skrá Glatkistunnar á þessum degi:

Þingeyingurinn Baldur Ragnarsson tónlistarmaður og áhugaleikari er þrjátíu og átta ára gamall í dag. Þótt flestir tengi Baldur við gítarleik og söng í  hljómsveitinni Skálmöld hefur hann komið við í miklum fjölda sveita af ýmsu tagi, sem vakið hafa athygli með plötum sínum. Þar má nefna Ljótu hálfvitana, Morðingjana og Innvortis en einnig minna þekkt bönd eins og Bófa og Dætrasyni en hann spilar á hin ólíklegustu og ólíkustu hljóðfæri í þessum sveitum.

Þá er Ómar Stefánsson myndlistamaður sextíu og tveggja ára gamall í dag en hann kom nokkuð við sögu íslensks tónlistarlífs á sínum tíma, á námsárum sínum við nýlistadeild MHÍ var hann trommuleikari hinnar alræmdu sveitar Bruna BB og kom reyndar einnig við sögu á kassettu sem nemendur nýlistadeildarinnar gaf út á sínum tíma, þar fyrir utan var hann einn meðlima gjörningasveitarinnar Inferno 5.

Svava Bernharðsdóttir lágfiðluleikari er einnig sextíu og tveggja ára gömul í dag. Auk þess að hafa leikið með Sinfóníuhljómsveit Íslands, Skálholtskvartettnum og Kammersveit Reykjavíkur hefur hún leikið með fílharmóníu-, sinfóníu- og kammersveitum víða um lönd s.s. í Sviss og Slóveníu, og hefur jafnframt sinnt tónlistarkennslu og leikið inn á fjölda útgefinna platna, m.a. í eigin nafni.

Barnastjarnan Sigríður Anna Þorgrímsdóttir eða Anna Sigga eins og hún var ævinlega kölluð hér áður fyrr er sjötíu og fimm ára gömul á þessum degi. Anna Sigga er þekktust fyrir samstarf sitt með Soffíu Árnadóttur en saman sungu þær nokkur barnalög sem nutu mikilla vinsælda í kringum 1960, lög eins og Snjókarlinn, Órabelgur og Komdu niður.

Að síðustu er hér nefndur Guðmundur Kristjánsson tenór söngvari frá Búðardal (fæddur 1901) sem bjó reyndar mestan hluta ævi sinnar erlendis, lengst af í Bandaríkjunum þar sem hann kenndi einnig söng og stjórnaði kórum Íslendinga. Ein 78 snúninga plata kom út með Guðmundi en hann lést 1986.

Vissir þú að KK ferðaðist sem kornabarn um þjóðveg 66, veginn sem hann söng löngu síðar sjálfur um?