Afmælisbörn 12. desember 2016

Jónas Friðrik

Jónas Friðrik Guðnason

Glatkistan hefur á skrá sinni í dag þrjú tónlistartengd afmælisbörn:

Jóhann Friðgeir Valdimarsson tenór á afmæli og er fjörutíu og níu ára gamall, hann nam söng hér heima og á Ítalíu, hefur starfað m.a. í Íslensku óperunni, með Frostrósum og Mótettukórnum, auk þess að syngja á plötum annarra tónlistarmanna. Jóhann Friðgeir hefur gefið út fjórar sólóplötur.

Orri Harðarson trúbador og rithöfundur er fjörutíu og fjögurra ára, hann vakti fyrst athygli í Músíktilraunum með hljómsveitinni Óþekktum andlitum frá Akranesi og síðan með Tregablandinni lífsgleði og öðrum Skagasveitum, hann hefur spilað á plötum annarra auk þess að annast upptökustjórn og útsetningar, mest hefur hann unnið einn, enda hefur hann gefið út nokkrar sólóplötur.

Og að síðustu er hér nefndur ljóð- og textaskáldið frá Raufarhöfn Jónas Friðrik Guðnason en hann er sjötíu og eins árs gamall á þessum degi. Jónas Friðrik er auðvitað kunnastur fyrir samstarf sitt við Ríó tríó en hann hefur einnig samið texta fyrir Björgvin Halldórsson, Mána, Sléttuúlfana, BG og Ingibjörgu, Diddú, Brimkló og Strumpana svo einungis fáein dæmi séu hér nefnd. Þess má geta að skáldið syngur eitt þekktasta Ríó-lagið, Allir eru að gera það.