Jón og ég

Jón og ég
(Lag / texti: erlent lag / Haraldur Á. Sigurðsson)

Jón og ég við vorum eins og bræður,
áttum föður sem var okkur kær.
Ekki skorti okkur heldur mæður
því ei þær reyndust færri vera en tvær.

viðlag
Lánið elti Jón en lét í friði mig,
lánsami Jón, ég öfunda þig.

Við vorum látnir ganga menntaveginn,
Jón varð stúdent 1901.
Mikið varð hann faðir okkar feginn
en fyrir mér það gekk ekki jafn greitt.

viðlag

Nonni bróðir lærður var í lögum,
á lokaprófi varð hann númer eitt.
Mér gekk heldur illa í flestum fögum,
ég fékk því alltaf núll komma ekki neitt.

viðlag

Svo kom þar, að bað ég hennar Bistu,
Bista sagði já og kyssti mig.
Unaðsleg var ást okkar í fyrstu
uns Jón tók hana bara fyrir sig.

viðlag

Nonni dó og kúrir nú í kistu
sem kostaði meira en til átti það svín.
En ég er stjúpi barnanna hennar Bistu
því Bista hans Jóns er núna konan mín.

[m.a. á plötunni Skagakvartettinn – Kátir voru karlar]