Afmælisbörn 19. mars 2017

Þorsteinn Hannesson

Fjögur tónlistartengd afmælisbörn koma við sögu dagsins:

Fyrstan skal nefna Sigurð Björnsson óperusöngvara sem er áttatíu og fimm ára í dag. Hann nam söng fyrst hér heima hjá Guðmundi Jónssyni, Kristni Hallssyni og fleirum en fór til framhaldsnáms í Þýskalandi, þar starfaði hann um árabil. Ein fjögurra laga plata með jólasálmum kom út hér heima með Sigurði um 1960. Söng hans má þó heyra á fleiri plötum s.s. með Einsöngvarakvartettnum sem hann söng með á sínum tíma.

Leoncie India Martin á sextíu og fjögurra ára afmæli en hún hefur starfað meira og minna hérlendis síðan 1982, framan af undir nafninu Indverska prinsessan. Leoncie hefur gefið út níu sólóplötur og hafa lögin Ást á pöbbnum og Draumurinn um Keflavík notið einna mestra vinsælda af þeim.

Kópavogsbúinn Steinn Skaptason er fimmtíu og fjögurra ára en hann er einn af helstu poppfræðingum landsins, og mikill áhugamaður um plötusöfnun. Steinn er sonur Skapta Ólafssonar söngvara og hefur sjálfur verið í hljómsveitum. Þar má nefna sveitirnar Pig face, Áreitin, Nema lögreglan, Blóðtakt, Ys, Stífgrím, Videósílín og Stunu úr fornbókaverslun svo einungis fáeinar séu nefndar.

Þorsteinn Hannesson tenórsöngvari átti einnig afmæli á þessum degi en hann lést árið 1999. Þorsteinn (f. 1917) sem var frá Siglufirði, lærði söng í London en starfaði víðs vegar um Evrópu að námi loknu. Hann kom heim til Íslands 1954 og sinnti hér ýmsum tónlistarlegum verkefnum, fékkst m.a. við kennslu, starfaði við tónlistardeild Ríkisútvarpsins og kom að ýmsum félagsstörfum í tónlistargeiranum. Söng Þorsteins má heyra á fjölmörgum plötum, m.a. safnplötu í útgáfuröðinni útvarpsperlur, á vegum Ríkisútvarpsins.