Afmælisbörn 6. febrúar 2018

Signý Sæmundsdóttir

Fjölmörg afmælisbörn í tónlistargeiranum koma við sögu í dag:

Signý Sæmundsdóttir sópransöngkona er sextug í dag og á stórafmæli dagsins en hún hefur sungið á fjölmörgum plötum, meðal annars með Bergþóri Pálssyni og sem einsöngvari með kórum. Hún hefur einnig raddþjálfað og stjórnað söngkvartettnum Út í vorið og kammerkórnum Ópus 12 / Kammerkór Þorgeirs.

Einar Tönsberg er fjörutíu og fimm ára, hann hefur gefið út plötur og leikið með ýmsum hljómsveitum og undir ýmsum nöfnum en þar má nefna Cigarette, Lorien, Didda, Eberg, Óðflugu og Feldberg en hann hefur einnig starfað við kvikmyndatónlist og gefið út tónlist í félagi við aðra s.s. Pétur Ben.

Hildur Vala Einarsdóttir söngkona er þrjátíu og sex ára gömul, henni skaut á stjörnuhimininn þegar hún sigraði Idol stjörnuleitarkeppnina 2005 og í kjölfarið gaf hún út tvær plötur, hún hefur ennfremur fengist við fjölbreytileg söngverkefni eftir sigur sinn, leysti Ragnhildi Gísladóttur af í Stuðmönnum og sungið á fjölmörgum plötum ýmissa listamanna. Sólóplata er væntanleg með Hildi Völu.

Jón Páll Bjarnason gítarleikari hefði einnig átt afmæli í dag en hann lést 2015. Hann fæddist á Seyðisfirði 1938 en fluttist síðar til höfuðborgarsvæðisins, lærði á ýmis hljóðfæri en gítarinn varð að lokum hans aðal hljóðfæri. Hann lék með ýmsum hljómsveitum s.s. KK sextett, Hljómsveit Andrésar Ingólfssonar, Hljómsveit Björns R. Einarssonar og Hljómsveit Ragnars Bjarnasonar áður en hann söðlaði um, fór til Svíþjóðar og síðar Bandaríkjanna þar sem hann starfaði um árabil. Jón Páll flutti heim aftur um aldamótin, gaf út sólóplötu og aðra í félagi við Ólaf Gauk en hefur að auki leikið inn á tugi platna.

Auglýsingar