Afmælisbörn 26. mars 2018

Kristján Kristjánsson KK

Tvö afmælisbörn úr tónlistargeiranum líta dagsins ljós á Glatkistunni í dag:

Hafnfirðingurinn Starri Sigurðarson bassaleikari Jet Black Joe og Nabblastrengja er fjörutíu og fjögurra ára gamall í dag. Starri hefur leikið með Jet Black Joe nánast frá upphafi en með Nabblastrengjum reis ferill hans hæst er þeir félagarnir sigruðu Músíktilraunir Tónabæjar, þá ungir að árum.

Söngvaskáldið og dagskrárgerðarmaðurinn Kristján Kristjánsson, betur þekktur sem KK, á einnig afmæli en hann er sextíu og tveggja ára gamall á þessum degi. Allir þekkja auðvitað Kristjáns og lög hans en hann hefur sent frá sér aragrúa platna og laga einn síns liðs, með KK-bandinu sínu og í samstarfi við Magnús Eiríksson og fleiri. Meðal laga KK má nefna Lucky one, Talandi dæmi, Óbyggðirnar kalla, Vegbúinn, I think of angels, Grand hótel og Bein leið svo einungis fáein dæmi séu tiltekin.