Afmælisbörn 2. október 2018

Jose Riba

Afmælisbörn dagsins eru fjögur í dag, þetta er dagur trommuleikara:

Birgir Baldursson trommuleikari er fimmtíu og fimm ára gamall. Birgir hefur leikið með ógrynni hljómsveita þar sem fjölbreytileikinn er í fyrirrúmi og hann er án efa sá trommuleikari sem leikið hefur með flestum sveitum hérlendis, hér eru einungis fáein sýnishorn: S.H. draumur, Stífgrím, Hitchcock, Jónatan Livingstone kría, Sálin hans Jóns míns, Blúsboltarnir, Bundið slitlag, DBD, Gakk, Helmut, Svefngalsar, Bless, Belfigor, Danshljómsveit Íslands og Craftblock.

Annar trommuleikari, Sigtryggur Baldursson á afmæli en hann er fimmtíu og sex ára. Hann er auðvitað þekktastur fyrir aukasjálf sitt, Bogomil Font og hefur starfrækt Milljónamæringana samhliða því en hann er einnig kunnur fyrir veru sína í Sykurmolunum (Sugarcubes), Þeyr, Kukl, Algorythmunum, DIP, Grindverki, Hattímas, Steintryggi og fleiri sveitum. Sigtryggur hefur verið ötull talsmaður fyrir réttindum og félagsmálum tónlistarmanna undanfarin ár.

Þriðji trommuleikarinn, Eysteinn Eysteinsson, á afmæli í dag en hann er fjörutíu og tveggja ára gamall á þessum degi. Eysteinn hefur leikið með fjölda hljómsveita og á mörgum plötum annarra tónlistarmanna, meðal sveita hans má nefna Not correct, Buff, Partýtertuna, Taktík, Vestanáttina, Yrju og Papa, svo fátt eitt sé upp talið.

José Riba fiðluleikari (1907-95) átti ennfremur afmæli þennan dag. Hann fluttist til Íslands frá Spáni um miðja öldina og varð virkur í íslensku tónlistarlífi, hann kenndi tónlist, starfaði með Sinfóníuhljómsveit Íslands og starfrækti eigin hljómsveitir um árabil. Riba tók sér íslenskan ríkisborgararétt árið 1956 og tók sér þá nafnið Ólafur Jósef Pétursson.

Auglýsingar