Afmælisbörn 7. október 2018

Friðrik Dór

Á þessum degi eru fimm afmælisbörn á skrá Glatkistunnar:

(Guðmunda) Ragnhildur Gísladóttir er sextíu og tveggja ára gömul í dag. Ragnhildur hefur sungið með nánast öllum þekktum sveitum frá því að hún hóf sinn tónlistarferil sem bassaleikari hljómsveitarinnar Sveindísar, síðan komu sveitir á borð við Tilviljun og í kjölfarið Lummurnar, Brunaliðið, Brimkló, Grýlurnar og Stuðmenn en Ragnhildur á einnig sólóferil að baki auk samstarfs við Jakob F. Magnússon í Human body orchestra og Ragga & the Jack Magnet Orchestra svo annars konar dæmi séu tekin.

Gunnar Lárus Hjálmarsson eða bara Dr. Gunni er fimmtíu og þriggja ára í dag. Gunnar var lengi neðanjarðar í rokktónlistasköpun sinni með sveitum á borð við Beri beri, F/8, Dordinglum, S.H. draumi, Unun og Bless en hlaut einskonar opinbera viðurkenningu með barnaplötunni Abbababb. Hann hefur alltaf unnið sólóefni og starfaði lengi við blaðamennsku í tengslum við tónlist og hefur á síðustu árum og áratugum skapað sér nafn sem einn helsti popptónlistarfræðingur þjóðarinnar, og gefið út bækur í því samhengi.

Friðrik Dór Jónsson popptónlistarmaður er þrítugur og á stórafmæli dagsins. Friðrik starfaði í hljómsveitinni Fendrix á unglingsárunum en söng fyrst inn á plötu sem innihélt söngleikinn Welcome to the jungle þegar hann var í Verzló. Hann varð þó fyrst þekktur fyrir sólóefni sitt en hann hefur gefið út sólóplötur en auk þess starfað með röppurum og öðrum tónlistarmönnum á borð við Emmsjé Gauta, Blaz Roca, Immo, Kiasmos og StopWaitGo. Allir þekkja líka framlag hans til Eurovision keppninnar í undankeppninni 2015. Hann sendir reglulega frá sér stórsmelli.

Díana (Bjarney) Magnúsdóttir söngkona er sjötíu og fimm ára gömul á þessum degi. Hún þótti afar efnileg dægurlagasöngkona á sínum tíma og hóf ung að syngja með Hljómsveit Skafta Ólafssonar en síðar City sextett, Fimm í fullu fjöri, JJ kvintett og KK sextett svo fáein dæmi séu nefnd. Öllum að óvörum hætti Díana að syngja að mestu um áramótin 1961-62 og þótti mörgum sjónarsviptir af henni.

Söngvarinn og trommuleikarinn Skapti Ólafsson (1927-2017) hefði einnig átt afmæli á þessum degi. Skapti var af fyrstu rokkkynslóðinni, söng og lék á trommur með ýmsum sveitum eins og Fjórum jafnfljótum, Hljómsveit Baldurs Kristjánssonar, Hljómsveit Carls Billich og Hljómsveit Magnúsar Randrup auk eigin sveitar en hann varð þekktastur fyrir söng sinn í lögunum Ó nema ég og Allt á floti á þessum upphafsárum rokksins. Lög hans hafa margsinnis verið gefin út á safnplötum síðan en einnig gaf hann út sólóplötu.

Auglýsingar