Afmælisbörn 7. janúar 2019

Anna Mjöll Ólafsdóttir

Enn og aftur er dagurinn fullur af tónlistartengdum afmælisbörnum:

Kristján Hreinsson (Hreinsmögur) tónlistarmaður og tón- og textaskáld með meiru er sextíu og tveggja ára gamall á þessum degi. Fyrir utan að hafa samið mörg hundruð texta sem komið hafa út á plötum hefur Kristján gefið út fjölmargar plötur undir eigin nafni frá 1990.

Stefán (Guðmundur) Óskarsson trúbador frá Raufarhöfn er fimmtíu og sex ára í dag. Hann skemmti hér áður heilmikið á árshátíðum og skemmtunum um land allt um árabil og gaf árið 2000 út plötuna Rokk og rómantík.

Anna Mjöll Ólafsdóttir söngkona er fjörutíu og níu ára í dag, hún á ekki langt að sækja tónlistarhæfileikana því hún er dóttir Svanhildar Jakobsdóttur og Ólafs Gauks Þórhallssonar. Anna Mjöll hefur sungið í Landslagskeppninni, Látúnsbarkakeppninni og Eurovision en hún flutti framlag Íslendinga, Sjúbídú, árið 1996. Hún hefur bæði gefið út sólóplötur og í samstarfi við móður sína. Anna Mjöll hefur búið í Bandaríkjunum um árabil.

Samúel (Jón) Einarsson (Sammi rakari) á Ísafirði er sjötíu og eins árs gamall á þessum degi en hann er kunnur bassaleikari og hefur leikið með fjölda hljómsveita á Vestfjörðum. Meðal þeirra eru hér nefndar Sexmenn, Öx, Leones og svo auðvitað BG og Ingibjörg.

Njáll Þórðarson hljómborðsleikari hefði orðið fjörutíu og fimm ára gamall í dag en hann lést á síðasta ári eftir erfið veikindi. Njáll lék með ýmsum þekktum hljómsveitum eins og Vinum vors og blóma, Landi og sonum og Sælgætisgerðinni, og öðrum minna þekktum eins og Forte og Busunum.

Pétur (Wigelund) Kristjánsson var einnig fæddur á þessum degi en hann lést langt um aldur fram árið 2004. Pétur sem var fæddur 1952 var söngvari og bassaleikari fjölda hljómsveita á sjöunda, áttunda og níunda áratugnum og var ein af skærustu poppstjörnum íslenskrar tónlistarsögu. Meðal sveita sem Pétur starfaði með voru Póker, Pops, Pelican, Start, Dúndrið, Paradís, Náttúra og Gargið svo einungis fáeinar séu nefndar. Auk þess gaf Pétur út plötur undir eigin nafni og starfaði með mörgum öðrum tónlistarmönnum.

Auglýsingar