Afmælisbörn 8. janúar 2019

André Bachmann

Fimm tónlistartengd afmælisbörn koma við sögu í dag, þau eru:

Stórsöngvarinn og strætóbílstjórinn André Bachmann á stórafmæli en hann er sjötugur í dag, hann er einna þekktastur fyrir framlag sitt til ýmissa styrktarverkefna í formi tónleika og plötuútgáfu en hefur einnig gefið út sólóplötur og sungið með hljómsveitum eins og Hljómsveit Þorsteins Guðmundssonar (Steina spil), Aríu, Gleðigjöfunum, Stefnumótum og Hljómsveit André Bachmann.

(Guðjón) Halldór Óskarsson organisti og stjórnandi margra kóra í Rangárþingi er fimmtíu og þriggja ára. Hann hefur stýrt flestum kórum í Rangárvallasýslu á síðustu árum s.s. Karlakór Rangæinga, Kammerkór Rangæinga og Samkór Oddakirkju svo einhverjir séu nefndir, einnig hefur hann stjórnað eldri kór Karlakórs Reykjavíkur, Kvennakór Hafnarfjarðar og Barnakór Víðistaðakirkju svo dæmi séu tekin. Halldór söng sjálfur á yngri árum með sönghópum eins og Austan 9, RÁ-kvartettnum, Litlu Heklu og Viri Cantanes.

Akureyringurinn Karl (Birgir) Örvarsson tónlistarmaður er fimmtíu og tveggja ára gamall. Hann er af miklum tónlistarættum, er sonur Örvars Kristjánssonar en einnig eru bræður hans og frændur viðloðandi tónlist. Karl hefur gefið út sólóplötu en einnig sungið og leikið á hljómborð með hljómsveitum eins og Helfró, Hunang, Eldfuglinum, Stuðkompaníinu, Sýkkklunum, Trúboðunum og Skriðjöklum.

Georg Kári Hilmarsson bassaleikari og tónskáld er þrjátíu og sjö ára, hann hefur leikið með sveitum eins og Sprengjuhöllinni, Markús and the diversion sessions og rappdúettnum RLR. Georg Kári lauk tónsmíðanámi við Listaháskóla Íslands 2013.

Einnig hefði Steingrímur Eyfjörð Guðmundsson tónlistarmaður átt afmæli á þessum degi en hann lést árið 2009. Steingrímur (f. 1960) var í hljómsveitum eins og Júpiters, Oxsmá, Langa Sela og skuggunum, Hljómsveit Ellu Magg og Dívan grimma.

Auglýsingar