Heilræðavísur [3]

Heilræðavísur [3]
(Lag / texti: Magnús Þór Jónsson [Megas])

Ef þú ert kvalin örgustu pínslum
illra meina sífelldri nauð
og vondra manna vondum klækjum
mildi guðs að þú ert ekki dauð,
þá vappa skaltu inn í Víðihlíð,
Víðihlíð og Víðihlíð
og vera þar síðan alla tíð,
alla þína tíð.

Ef þú kúrir ein í horni
enginn þér sinnir þá græturðu lágt
og fáirðu matinn kaldan og klénan
og kjötið það sé bæði vont og hrátt,
þá vappa skaltu inn í Víðihlíð,
Víðihlíð og Víðihlíð
og vera það síðan alla tíð,
alla þína tíð.

Ef börnin í þig ónotum hreyta
æskirðu liðsinnis buguð af þraut
og ef bóndinn hann segir bless og er farinn
þá búið það tekur að vanta graut,
þá vappa skaltu inn í Víðihlíð,
Víðihlíð og Víðihlíð
og vera þar síðan alla tíð,
alla þína tíð.

Ef enginn þér sýnir samúð neina
en sorgirnar hlaðast að fyrir því
og ef engin hræða til þín tekur
tillit né sýnir viðmót hlý,
þá vappa skaltu inn í Víðihlíð,
Víðihlíð og Víðihlíð
og vera þar síðan alla tíð,
alla þína tíð.

Í Víðihlíð eru veður blíð,
vondir kallar þeir sjást ekki þar
og ótal strákar stökkvandi til þín
stefna og færa þér gnótt matar,
já vappa skaltu inn í Víðihlíð,
Víðihlíð og Víðihlíð
og vera þar síðan alla tíð,
alla þína tíð.

Þeir votta þér samúð votum hvörmum
og vítur samþykkja á pakkið illt og spillt
og sýna þér góðvild í einu og öllu
eyrun sperra þá græturðu milt og stillt,
já valhoppaðu inn í Víðihlíð,
Víðihlíð og Víðihlíð
og vertu þar síðan alla tíð,
alla þína tíð.

[af plötunni Megas – Megas]