Afmælisbörn 7. ágúst 2019

Bergur Geirsson

Í dag koma sex afmælisbörn við sögu Glatkistunnar:

Rannveig Jóhannsdóttir er sjötug í dag og á því stórafmæli en margir hinna eldri muna eftir henni frá fyrstu árum Sjónvarpsins en hún sá þá um Stundina okkar ásamt hrafninum Krumma. Reyndar kom einnig út lítil plata með þeim Rannveigu og Krumma. Rannveig var lítið áberandi eftir þetta sjónvarpsævintýri en birtist reyndar löngu síðar aftur í Ríkissjónvarpinu með morgunsjónvarp fyrir börn.

Hermann Jónsson á einnig stórafmæli á þessum degi en hann er fimmtugur. Hermann lék hér áður á bassa með fjölda hljómsveita og meðal þeirra má nefna sveitirnar Rauðir fletir, Orgill, Niður, Megakukl, Concert, Dýrlingarnir og Dýrið gengur laust.

Bergur Geirsson er fjörutíu og níu ára gamall í dag. Hann hefur leikið á bassa og önnur hljóðfæri með fjölda sveita s.s. Buff, Tríói Jóns Leifssonar, Saffó, Íslenska fánanum, Bítlunum og Hvatberum en hefur einnig gegnt umboðsmennsku, rótarastörfum og hljóðversstörfum í íslensku tónlistarlífi.

Katrín Helga Ólafsdóttir söngvari og hljómborðsleikari úr Hafnarfirði er tuttugu og þriggja ára gömul í dag. Hún hefur gefið út tónlist undir sólóista-nafninu K. Óla en hefur einnig starfað með hljómsveitum eins og White signal, Milkhouse og Marvin straight.

Skúli Gestsson bassaleikari Diktu á einnig afmæli í dag en hann er þrjátíu og sjö ára gamall. Skúli, sem reyndar leikur bæði á bassa og hljómborð, hefur starfað með Diktu síðan sveitin var stofnuð 1997 og tók þátt í tvennum Músíktilraunum með sveitinni áður en fyrsta platan kom út. Síðan hafa komið út fimm plötur með sveitinni.

Þá á fyrsti trommuleikari Hljóma, Eggert (Valur) Kristinsson sjötíu og sjö ára afmæli á þessum degi. Eggert sem er frá Keflavík lék með fjöldanum öllum af hljómsveitum þar í bæ, fyrst aðeins tólf ára með Hljómsveit Gagnfræðiskólans í Keflavík en síðan með sveitum eins og Saxon, Beatniks, Heiðursmönnum, Hljómsveit Guðmundar Ingólfssonar, Spútnik tríó, Capri tríó, Tíglum og Nátthröfnum svo nokkrar séu hér upp taldar.