Max [3] (1988-92)

Max

Unglingasveitin Max starfaði á Siglufirði fyrir og um 1990, en sveit með sama nafni hafði verið starfrækt í bænum tveimur áratugum fyrr.

Max var stofnuð í upphafi árs 1988 upp úr hljómsveitinni Ekkó og höfðu meðlimir sveitarinnar í upphafi verið þeir Jón Pálmi Rögnvaldsson trommuleikari, Pálmi Steingrímsson söngvari, Rúnar Sveinsson bassaleikari, Hilmar Elefsen gítarleikari og Örvar Bjarnason hljómborðsleikari, Sveinn Hjartarson tók við trommunum af Jóni Pálma við nafnabreytinguna. Hlöðver Sigurðsson tók við söngvarahlutverkinu af  Pálma snemma árs 1989 og þannig skipuð keppti sveitin í Músíktilraunum Tónabæjar um vorið, hafði þar reyndar ekki erindi sem erfiði og komst ekki í úrslit keppninnar.

Sveitin spilaði víða um norðanvert landið á starfstíma sínum, og m.a. þrívegis á útihátíð í Húnaveri um verslunarmannahelgar, á Síldarævintýrinu á Siglufirði og víðar. Um tíma mun sveitin hafa verið söngvaralaus en Pálmi Steingrímsson söngvari kom síðan inn og þá starfaði sveitin til ársins 1992.

Max var endurvakin löngu síðar, árið 2009 undir nafninu Hugrakka brauðristin Max.