Afmælisbörn 16. mars 2020

Jón Sigurðsson

Glatkistan hefur þrjú afmælisbörn á takteinum í dag:

Páll Óskar Hjálmtýsson hinn eini sanni er hvorki meira né minna en fimmtugur í dag. Hann þarf vart að kynna en hann kom fyrst fram á sjónarsviðið á ævintýraplötum Gylfa Ægissonar, plötum Áhafnarinnar á Halastjörnunni og plötu með tónlistinni úr leikritinu Gúmmí Tarzan en allt þetta var þegar hann var enn rétt um og ríflega tíu ára gamall. Palli er af mikill söngfjölskyldu og hefur sungið mestmegnis sem sólóisti, hann hefur til að mynda gefið út margar sólóplötur, þá fyrstu 1993. Hann hefur þó einnig sungið með hljómsveitum eins og Milljónamæringunum og Casinó, og farið sem fulltrúi Íslands í Eurovision keppnina (1997). Palli poppar reglulega upp með stórsmelli og stórtónleika í farteskinu.

Kristjana Arngrímsdóttir söngkona frá Dalvík er fimmtíu og níu ára gömul á þessum degi, hún hefur á ferli sínum sungið á fjölda platna annarra tónlistamanna en hefur einnig gefið út nokkrar sólóplötur sjálf á síðustu árum. Kristjana var í Tjarnarkvartettnum á sínum tíma sem gaf út plötur.

Þá átti trompetleikarinn Jón Sigurðsson afmæli þennan dag en hann lést árið 2019. Jón (fæddur 1927) starfaði með mörgum af þekktustu hljómsveitum sjötta áratugarins, m.a. KK-sextettnum og Hljómsveit Björns R. Einarssonar, hann starfaði einnig með Sinfóníuhljómsveit Íslands í nærri því fimm áratugi og lék með (og stjórnaði einnig) fjölda lúðrasveita út um allt land á ferli sínum. Hann kenndi jafnframt tónlist í tónlistarskólum alla sína starfsævi.