Þjóðin og ég

Þjóðin og ég
(Lag / texti: Torfi Ólafsson / Aðalsteinn Kristmundsson (Steinn Steinarr))

Ég er einn á gangi og hugsanir mínar hljóðar
hverfa inn í rökkvaðan skóg þess, sem liðið er.
Mitt stolt er að vera sonur þessarar þjóðar.
En þjóðin er ekki líkt því eins stolt af mér.

Í þögulli auðmýkt og tilbeiðslu stend ég og stari:
Hér stendur það skráð, sem þeir ortu hver fyrir sig,
hinir þjóðfrægu menn og hinn þungbúni nafnlausi skari.
En þjóðin kann ekki nokkurt ljóð eftir mig.

Og andspænis samstilltum verknaði huga og handa
í hrifni og undrun ég stansa við fótmál hvert.
Sjá, þannig skal vandað til þess, sem lengi á að standa.
En þjóðin veit að ég hefi ekkert gert.

Og samt er mitt líf aðeins táknmynd af þessari þjóð,
og þjóðin sem heild er tengd við mitt ókunna ljóð.

[m.a. á plötunni Torfi Ólafsson og Rósin – Í stuði]