Afmælisbörn 14. desember 2020

Fjóla Karlsdóttir

Afmælisbörn Glatkistunnar í dag eru eftirfarandi:

Friðrik S. Kristinsson kórstjórnandi með meiru er fimmtíu og níu ára gamall, hann hefur stýrt kórum eins og Karlakór Reykjavíkur, Snæfellingakórnum, Unglingakór Hallgrímskirkju, Drengjakór Reykjavíkur og Landsbankakórnum en hann er menntaður söngkennari og starfar einnig sem slíkur. Hann hefur sungið sjálfur inn á plötur enda söngmenntaður.

Ástvaldur (Zenki) Traustason hljómborðsleikari er fimmtíu og fjögurra ára gamall í dag, hann hefur leikið með sveitum eins og Babadú, Tangósveit lýðveldisins, Stórsveit Reykjavíkur, Mao, Bardukha, Milljónamæringunum og Sálinni hans Jóns míns. Ástvaldur er skólastjóri Tónheima.

Ingvar Jónsson fyrrverandi söngvari Papanna fagnar fimmtíu og eins árs afmæli, hann söng með Pöpunum og á plötum þeirra 1991-2000, hann hefur einnig sungið með Góðum landsmönnum og starfað sem trúbador, veislustjóri, kennari og margt annað.

Haraldur Freyr Gíslason trommuleikari (og söngvari) úr Hafnarfirði er fjörutíu og sex ára gamall í dag. Þekktustu sveitir hans eru auðvitað Botnleðja og Pollapönk en aðrar minna þekktar eru sveitir eins Hafnarfjarðarmafían og Amma rúsína. Þá hefur Halli sent frá sér tvær sólóplötur, þar af aðra undir aukasjálfinu Fulli kallinn. Hann hefur síðustu árin starfað sem formaður Félags leikskólakennara.

Þá er hér að síðustu nefnd söngkonan Fjóla Karlsdóttir en hún var af fyrstu kynslóð dægurlagasöngvara á Íslandi. Hún söng með hljómsveitum eins og Stereo kvintettnum og Neo tríóinu á árunum 1958 og 59 áður en hún sneri sér að öðrum verkefnum. Fjóla er áttatíu og fjögurra ára gömul í dag.

Vissir þú að hljómsveitin Diabolus in musica gekk einhverju sinni undir heitinu „Stormsveit efri deildar, sómi hennar sverð og skjöldur, til sjávar og sveita, hnífs og skeiðar”?