Afmælisbörn 11. júlí 2021

Grétar Örvarsson

Sjö afmælisbörn eru á lista Glatkistunnar í dag:

Söngvarinn og hljómborðsleikarinn Grétar (Þorgeir) Örvarsson er sextíu og tveggja ára gamall í dag. Grétar sló í gegn með hljómsveit sinni Stjórninni þegar hann og Sigga Beinteins sungu framlag Íslands í Eurovision keppninni 1990. Í kjölfarið gaf Stjórnin út nokkrar plötur sem allar nutu vinsælda en einnig hefur Grétar starfað með og starfrækt hljómsveitir eins og BSG, Hljómsveit Grétars Örvarssonar, Alvöruna og Dans á rósum.

Julian (Michael) Hewlett tónskáld, kórstjórnandi og píanóleikari er fimmtíu og fjögurra ára gamall í dag. Hann hefur starfað á Íslandi sem tónlistarkennari og stjórnandi kóra síðan seint á níunda áratug liðinnar aldar, fyrst á Skagaströnd og Egilsstöðum áður en hann fluttist á höfuðborgarsvæðið. Meðal kóra sem hann hefur stjórnað eru Samkór Kópavogs, Kvennakór Kópavogs, Boudoir, Kór Kópavogskirkju og Englakórinn.

Tónlistarmaðurinn Hrafn Thoroddsen er fjörutíu og átta ára í dag. Hann hefur sungið og leikið á hljómborð, orgel gítar og önnur hljóðfæri í ýmsum þekktum hljómsveitum og má þar nefna sveitir eins og Ensími, Jet Black Joe, Dr. Spock, Egó og SSSól.

Siglfirðingurinn Helgi Svavar Helgason trommuleikari er fjörutíu og þriggja ára í dag. Helgi hefur komið víða við á sínum ferli og leikið með hljómsveitum af ýmsum stærðum og gerðum, þekktastar þeirra eru án efa Senuþjófarnir, Memfísmafían og Flís en einnig má nefna Rodent, Funkmaster 2000, Grams, Stórsveit Samúels J. Samúelssonar, Klezmersveitina Schpilkas, Endurskoðendurna og Benni Hemm Hemm.

Magnús Guðmundsson, oftast kenndur við hljómsveitina Þey, er sextíu og eins árs gamall á þessum degi. Magnús var söngvari Þeysara frá upphafi og var einnig í ýmsum undanförum þeirrar sveitar s.s. Fellibylnum Þórarni, Hattimas og Frostrósum, en hann hefur einnig starfað með hljómsveitunum Plágunni, Rauð vík, Iceland og Með nöktum.

Anna (Sigríður) Þorvaldsdóttir tónskáld er fjörutíu og fjögurra ára gömul í dag. Hún kemur upphaflega frá Borgarnesi, lærði á selló og síðan tónsmíðar við LHÍ og í Bandaríkjunum og hefur sent frá sér tónverk og plötur (s.s. Dreymi, Rhizoma, Aerial og In the light of air) sem hafa unnið til verðlauna á alþjóðlegum vettvangi, hún hefur t.a.m. unnið tónlistarverðlaun Norðurlandaráðs og fjölda verðlauna á Íslensku tónlistarverðlaununum.

Að síðustu er hér nefndur klarinettu- og saxófónleikarinn Andrés (Sverrir) Ingólfsson. Andrés fæddist 1935, hann lék með mörgum af helstu hljómsveitum landsins s.s. KK-sextett, Hljómsveit Ingimars Eydal, Lúdó sextett, Sextett Ólafs Gauks, Hljómsveit Ragnars Bjarnasonar, Orion kvartettnum og Icelandic All star auk þess að starfrækja eigin sveit um tíma. Hann lék ennfremur inn á fjölda hljómplatna á ferli sínum en hann lést aðeins 43 ára gamall árið 1979.

Vissir þú að lúðrasveit var starfrækt á Eyrarbakka í kringum aldamótin 1900?