Afmælisbörn 9. september 2021

Eyþór Gunnarsson

Tvö afmælisbörn eru á lista Glatkistunnar að þessu sinni:

Eyþór Gunnarsson hljómborðs- og ásláttarleikari á stórafmæli en hann er sextugur í dag. Eyþór byrjaði feril sinn með Ljósunum í bænum, Tívolí og Mezzoforte en hefur síðan leikið með ýmsum þekktum og óþekktum böndum, þar á meðal eru Stuðmenn, KK band, Mannakorn og Ófétin en Eyþór hefur einnig leikið með óteljandi djassböndum, jafnt skamm- sem langlífum.

Keflvíkingurinn Rebekka Bryndís Björnsdóttir fagott- og slagverksleikari hljómsveitarinnar Hjaltalín er þrjátíu og sex ára gömul á þessum degi. Hennar fyrstu afrek í tónlistinni voru þó á söngsviðinu því átta ára gömul söng hún á plötunni Hemmi Gunn og Rúnni Júll syngja fyrir börnin, tveimur árum síðar mátti einnig heyra í henni á plötunni Jólaball með Giljagaur. Rebekka er nú við nám í Bandaríkjunum.

Vissir þú að Kristján Kristjánsson (KK) hafði starfrækt hljómsveitina The Grinders í Svíþjóð áður en hann kom heim til Íslands og hóf eiginlega blústónlistarferil hér heima?