Afmælisbörn 29. mars 2022

Þórir Baldursson

Fjögur afmælisbörn dagsins eru eftirfarandi:

Þórir Baldursson hljómborðsleikari er sjötíu og átta ára í dag. Hann er frá Keflavík og tilheyrir þeirri kynslóð þaðan sem markaði bítlaslóðir hérlendis, hann var þó meira í þjóðlagastílnum í upphafi. Þórir bjó lengi og starfaði að tónlist sinni í Þýskalandi, Bandaríkjunum og miklu víðar með tónlistarfólki eins og Donnu Summer, Giorgio Moroder, Grace Jones o.fl. en kom heim 1990. Þórir hefur samið fjöldann allan af lögum, útsett, spilað og komið að tónlistinni á einn eða annan hátt nánast alla ævi og er afar virtur í sínu fagi.

Hera Björk Þórhallsdóttir söngkona á stórafmæli í dag en hún er fimmtug. Hún er dóttir Hjördísar Geirs söngkonu þannig að hún á ekki langt að sækja hæfileikana, Hera hefur sungið Eurovision framlag Íslendinga, gefið út sólóplötur, unnið mikið með Friðriki Ómari og sungið með hljómsveitum, sönghópum og kórum allt frá unglings aldri, þar má nefna Orgil, Reykjavík 5, Sweety og 17 vélar.  Hún hefur verið sérlega áberandi í jólatónlistinni, söng m.a. með Frostrósunum.

Egill Örn Rafnsson trommuleikari á einnig stórafmæli en hann er fertugur í dag. Hann hefur setið við trommusettið nánast frá fæðingu en hann er sonur Rafns Jónssonar (Rabba) og bróðir Ragnars Sólberg. Eðlilega hefur hann því oft setið við trommurnar við plötuupptökur sem tengjast fjölskyldufyrirtækinu (R&R músík) en auk þess hefur hann starfað með hljómsveitum eins og Dimmu, Woofer, Buttercup, Ber, Bergrisunum, Sign og Noise svo nokkrar séu hér upp taldar.

Þá er tónlistarmaðurinn Valtýr Björn Thors fimmtíu og sjö ára gamall á þessum degi. Fáir hafa leikið með jafnmörgum sveitum og hann en þær skipta mörgum tugum, hér má nefna Eilífðarvélina, Skjaldmeyjar flotans, Legó, Skruggur, Fist, Funk harmony park og Graupuna svo aðeins fáeinar séu tíndar til.

Vissir þú að til var fólk sem vildi láta banna lagið Bjössi á mjólkurbílnum á sínum tíma því það varpaði hetjuljóma yfir þá sem aka eins og vitlausir menn?