Afmælisbörn 22. apríl 2022

Sigurður Rósi Sigurðsson

Fimm afmælisbörn koma við sögu gagnagrunns Glatkistunnar að þessu sinni:

Páll Kristinn Pálsson söngvari hljómsveitarinnar Fjörefnis er sextíu og sex ára gamall á þessum degi, hann er klárlega þekktastur fyrir að syngja lagið Dansað á dekki sem fyrrgreind hljómsveit gaf út 1979. Páll hafði áður verið í hljómsveitinni Dögg en hann átti síðar eftir að hasla sér völl sem rithöfundur.

Matthías M.D. Hemstock trommu- og slagverksleikari er fimmtíu og fimm ára gamall í dag, hann hefur þótt ómissandi þegar kalla hefur þurft til slagverksleikara til að leika inn á plötur en þar má t.d. nefna plötur Jóels Pálssonar, Skúla Sverrissonar, Hilmars Jenssonar, Tómsar R. Einarssonar, Ólafar Arnalds, Jóhanns Jóhannssonar o.fl. Matthías hefur einnig leikið með hljómsveitum eins og Todmobile, Havanabandinu, Kerfli, Rússíbönum, Saltfiskssveit Villa Valla og Caput.

Þriðja afmælisbarn dagins er tónlistarmaðurinn Steinar (Baldursson) sem er tuttugu og sjö ára gamall á þessum degi en hann gaf út plötuna Beginning árið 2013 og vakti fyrir það mikla athygli, þá aðeins átján ára Verzlunarskólanemi. Steinar sendi reglulega frá sér smáskífur um tíma en minna hefur farið fyrir honum síðustu árin.

Tónlistarmaðurinn Sigurður Rósi Sigurðsson frá Ísafirði er sjötíu og tveggja ára gamall í dag. Sigurður Rósi lék á gítar með fjölmörgum vestfirskum hljómsveitum hér áður fyrr s.s. Náð, Ýr, Danshljómsveit Vestfjarða, Hljómsveit Ásgeirs Sigurðssonar og Gancia áður en hann fluttist til Nýja Sjálands en þar hefur hann búið síðustu áratugina, leikið þar með hljómsveitum og komið fram sem trúbador.

Þá er hér að síðustu nefndur Halldór Ingi Andrésson tónlistaráhugamaður og blaðamaður (fæddur 1954) sem skrifaði um tónlist um árabil. Halldór Ingi starfaði einnig að tónlist með margvíslegum öðrum hætti, m.a. sem útgáfustjóri hjá Fálkanum, hann var verslunarstjóri hjá Japis og rak um tíma jafnframt sjálfur plötubúð auk þess að starfa við dagskrárgerð í útvarpi svo dæmi séu nefnd. Halldór Ingi lést árið 2021.

Vissir þú að Greifarnir hafa notað risastórar nærbuxur í auglýsingaskyni?