Afmælisbörn 18. ágúst 2022

Salomon Heiðar

Afmælisbörn dagsins eru fjögur að þessu sinni:

Haraldur Leví Gunnarsson trommuleikari og plötuútgefandi er þrjátíu og fimm ára gamall á þessum degi en hann var þekktur sem trommuleikari hljómsveitanna Lödu sport og Lifun áður en hann stofnaði plötuútgáfuna Record record haustið 2007. Sú útgáfa lifir í dag góðu lífi og gefur út margar af frambærilegustu tónlistarmönnum landsins s.s. Júlíus Meyvant, Of monsters and men, Amabadama og Agent fresco.

Kristján Edelstein gítarleikari frá Akureyri á stórafmæli en hann er sextugur í dag. Kristján sem hefur mestmegnis starfað við hljóðupptökur síðustu áratugina og þ.a.l. leikið inn á fjölda platna, hefur þó leikið með ógrynni hljómsveita frá unga aldri, hér eru nokkur dæmi: Járnkarlarnir, Puppets, Skriðjöklar, Fire, Start, Út að skjóta hippa, Zikk zakk, Alvaran, Chaplin, Berserkir, PKK, Góðkunningjar lögreglunnar og Rokksveit Fúsa Óttars.

Þá á einnig afmæli á þessum annars ágæta degi tónlistarnördið Gestur Baldursson sem flestir kenna við Lucky records en hann er fjörutíu og átta ára gamall. Gestur er flestum fróðari um íslenska tónlist og tónlistarútgáfu en kassettur eru hans sérgrein ef svo má að orði komast.

Einnig er hér nefndur tónskáldið Salómon Heiðar (1889-1957) en hann var einnig organisti og kórstjórnandi. Hann var til að mynda organisti og stjórnandi Kórs Aðventkirkjunnar um árabil, einn af stofnendum Karlakórsins Þrasta í Hafnarfirði og starfaði einnig fyrir Karlakór Reykjavíkur.

Vissir þú að hljómsveitin Trabant hét upphaflega Traktor?