Margrét Ólafsdóttir

Margrét Ólafsdóttir telst með fyrstu dægurlagasöngkonum Íslands en í takt við tíðaranda þess tíma hvarf hún fljótlega af sjónarsviðinu til að sinna fjölskyldu og börnum, hún helgaði sig síðar tónmenntakennslu og eftir hana liggur töluvert magn af sönglögum og textum.

Margrét fæddist 1939 í Reykjavík og þegar ungir og efnilegir söngvarar fengu tækifæri til að láta ljós sitt skína við undirleik hljómsveita á skemmtunum upp úr miðjum sjötta áratugnum þegar rokkið var nýkomið til landins, tók hún þátt í því og söng með nokkrum sveitum haustið 1957, s.s. Orion kvintett, Hljómsveit Björns R. Einarssonar, Kvintett Jóns Páls Bjarnasonar og Hljómsveit Jose Riba áður en hún var ráðin til að syngja með Hljómsveit Karls Jónatanssonar í Vetrargarðinum í Tívolí vorið 1958. Þá um sumarið söng hún jafnframt með H.J. kvintettnum og G.F. kvintettnum í Vetrargarðinum þegar Karl og félagar fóru í frí en um haustið byrjaði hún aftur að syngja með Karli og hljómsveitinni hans.

Söngferill Margrétar stóð þó stutt yfir, hún gifti sig um þetta leyti nítján ára gömul og helgaði sig fjölskyldulífinu eftir það en alls eignaðist hún sex börn á tólf árum. Hún söng reyndar með kórum síðar, t.d. Lísukórnum, Kór Bústaðakirkju og Pólýfónkórnum, en á áttunda áratugnum lauk hún tónmenntakennaranámi samhliða barneignum og barnauppeldi en hún hafði einnig lært á fiðlu sem barn.

Hún hóf þá að stjórna Skólakór Fossvogsskóla og gerði það um árabil samhliða tónmenntakennarastarfi sínu við skólann, en gerðist einnig afkastamikill lagahöfundur og notaði þær lagasmíðar við kennslu auk texta sem hún samdi einnig. Þannig liggur eftir hana töluvert af safn lögum og textum sem hún birti á eigin vefsíðu, ÓMÓ-vefnum um aldamótin en hún hélt þeim vef úti um skeið og var reyndar vel tölvufær, var eins konar frumkvöðull í væðingu og notkun tölva í Fossvogsskóla sem varð jafnframt fyrstur skóla til að nýta sér tölvur við kennslu.

Afkomendur Margrétar hafa nú opnað nýjan ÓMÓ-vef sem tekið hefur við hlutverki hins eldri en þar er megin áhersla lögð á höfundarverk Margrétar en á annað hundrað laga hennar er að finna þar á nótum auk ljóða, þar er aukinheldur að finna söngtexta- og barnaleikjasafn sem hún hafði sjálf birt á eldri vefsíðunni.