Afmælisbörn 16. ágúst 2015

Ólafur Þórðarson

Ólafur Þórðarson

Tvö afmælisbörn eru á skrá í dag:

Sigurður (Pétur) Bragason baritónsöngvari er sextíu og eins árs. Sigurður nam söng og tónfræði frá Tónlistarskólanum í Reykjavík en stundaði síðan framhaldsnám á Ítalíu og Þýskalandi. Hann hefur sungið ýmis óperuhlutverk heima og erlendis, gefið út sjö plötur með söng sínum, auk þess að stýra nokkrum kórum s.s. Kór Kvennaskólans, Kammerkór Reykjavíkur og Árnesingakórnum. Sigurður var formaður Félags íslenskra söngvara um tíma og gegndi stöðu bæjarlistamanns Kópavogs 1989.

Ólafur Þórðarson (Óli í Ríó tríó) hefði einnig átt afmæli á þessum degi en hann lést 2011. Ólafur fæddist á Akureyri 1949 en flutti ungur í Kópvoginn þar sem hann starfaði í nokkrum þjóðlagatríóum áður en Ríó tríó kom til sögunnar. Sú sveit starfaði í áratugi og gaf út tugi hljómplatna en einnig gaf Ólafur út tvær sólóplötur. Hann starfrækti umboðsskrifstofuna 1000 þjalir um tíma en undir það síðasta starfaði hann með South river band sem hefur gefið út nokkrar plötur.