Afmælisbörn 20. ágúst 2015

Einar Júlíusson

Einar Júlíusson

Þrjú afmælisbörn koma við sögu á þessum degi:

Einar Júlíusson söngvari er sjötíu og eins árs. Einar söng með ýmsum hljómsveitum s.s. Saxon kvintett, H.J. kvartettnum og Hljómsveit Guðmundar Ingólfssonar áður en hann gerðist fyrsti söngvari Hljóma frá Keflavík. Síðar átti hann eftir að syngja með Pónik, t.d. lagið Léttur í lundu, og fleiri sveitum auk annarra verkefna. Margir muna eftir honum í laginu Simmsalabimm sem hann söng á móti Ruth Reginalds. Plata kom út á sínum tíma þar sem Einar söng dúetta ásamt Ellyju Vilhjálms.

Sigurður Möller Sívertsen trommuleikari er tuttugu og fimm ára. Sigurður er trymbill Grísalappalísu en gegndi einnig því hlutverki í Jakobínurínu og Dream central station. Hann hefur síðustu ár verið við kvikmyndagerðarnám erlendis, nú síðast í Bosníu Herzegóvínu.

Jónas Þórir Dagbjartsson trompet- og fiðluleikari frá Vestmannaeyjum hefði einnig átt afmæli á þessum degi en hann lést á síðasta ári. Jónas Þórir (f. 1926) lék með ýmsum hljómsveitum hér fyrrum, bæði lúðra- og danshljómsveitum eins og Lúðrasveit Vestmannaeyja, Hljómsveit Bjarna Böðvarssonar, Hljómsveit Aage Lorange og Hljómsveit Björns R. Einarssonar, og sveitum eins og Útvarpshljómsveitinni, Hljómsveit Tónlistarskólans og Sinfóníuhljómsveit Íslands.