Afmælisbörn 8. maí 2016

Ellen Kristjánsdóttir - Eigum ennþá langt í land

Ellen Kristjánsson

Sex afmælisbörn í tónlistarsögu Íslands eru í gagnagrunni Glatkistunnar að þessu sinni:

Ari Jónsson söngvari og trommuleikari er sextíu og sex ára gamall í dag. Auk þess að hafa gefið út sólóplötur og sungið á plötum ýmissa annarra listamanna, hefur Ari sungið og leikið með hljómsveitum á borð við Roof tops, Ómum, Altó, Borgís, Pónik, Sheriff, Ríó tríó, Cabarett og Hljómsveit Stefáns P.

Bergur Jón Þórðarson (Bergur Thorberg) er sextíu og fimm ára gamall í dag en hann gaf út sólóplötuna Metsöluplata sem kom út 1989, á henni var að finna frumsamið efni. Bergur hefur einnig starfað við myndlist og eru myndir hans, málaðar með kaffi, vel þekktar.

Valgeir Skagfjörð er sextugur og á því stórafmæli á þessum degi. Valgeir er laga- og textahöfundur, auk þess að hafa sungið og leikið á hljómborð í hljómsveitum eins og Haukum, Óla Fink, Tíbrá, Cabarett og Hafrót. Valgeir hefur sem tónskáld verið tíður gestur í undankeppnum Eurovision keppninnar, Söngvakeppni Sjónvarpsins.

Hjaltdælingurinn Jens Kr. Guð (eða Jens Kristján Guðmundsson) er einnig sextugur á þessum degi en hann er þekktur poppfræðingur, hefur bæði haldið úti tónlistartengdri bloggsíðu og ritað um tónlist í gegnum tíðina í blöð og tímarit eins og Þjóðviljann og Æskuna svo fáein séu hér nefnd, hann skrifaði ennfremur bókina Poppbókin – í fyrsta sæti, sem kom út 1983. Jens var í hljómsveitinni Frostmark hér áður og sjálfsagt fleiri sveitum, og er einnig kunnur fyrir drátthægni og skrautskrift.

Ellen (Rósalind) Kristjánsdóttir söngkona er fimmtíu og sjö ára. Ellen hefur, auk þess að hafa gefið út sex sólóplötur, sungið á plötum margra annarra tónlistarmanna. Hún hefur einnig starfað með bróður sínum KK og sungið gríðarlega mörg vinsæl lög með hljómsveitum eins og Ljósunum í bænum, Borgardætrum, Tívolí, Mannakornum, Póker og Kombóinu sem dæmi séu tekin.

Lizzie Þórarinsson sópransöngkona og bóndakona í Suður-Þingeyjasýslu (f. 1875) hefði átt afmæli á þessum degi en hún var fyrst kvenna til að syngja á plötu hérlendis. Lizzie var skosk en fluttist til Íslands þegar hún kynntist verðandi eiginmanni sínum. Hún lést 1962.