Afmælisbörn 14. desember 2016

Ástvaldur Traustason

Ástvaldur Traustason

Afmælisbörn Glatkistunnar í dag eru eftirfarandi:

Friðrik S. Kristinsson kórstjórnandi með meiru er fimmtíu og fimm ára, hann hefur stýrt kórum eins og Karlakór Reykjavíkur, Snæfellingakórnum, Unglingakór Hallgrímskirkju, Drengjakór Reykjavíkur og Landsbankakórnum en hann er menntaður söngkennari og starfar einnig sem slíkur. Hann hefur sungið sjálfur inn á plötur enda söngmenntaður.

Ástvaldur (Zenki) Traustason hljómborðsleikari er fimmtugur í dag og telst því eiga stórafmæli, hann hefur leikið með sveitum eins og Babadú, Tangósveit lýðveldisins, Stórsveit Reykjavíkur, Mao, Bardukha, Milljónamæringunum og Sálinni hans Jóns míns. Ástvaldur er skólastjóri Tónheima.

Ingvar Jónsson fyrrverandi söngvari Papanna er fjörutíu og sjö ára gamall, hann söng með Pöpunum og á plötum þeirra 1991-2000, hann hefur einnig sungið með Góðum landsmönnum og starfað sem trúbador, veislustjóri, kennari og margt annað.