Sól, ég hef sögu að segja þér

Sól, ég hef sögu að segja þér
(Lag / texti: Guðmundur Jónsson / Stefán Hilmarsson)

Hvað olli því að allt
er algjörlega á svig
við það sem kenndi ég?
Hvað kemur yfir mig?

Í huldu- þennan heim,
ég hélt með góðum hug.
Svo kraftmikill og ör
en kemst nú ekki á flug.

Draumur engils er úti,
en um leið annar draumur rétt að hefjast.

viðlag
Sól, ég er ólgandi inni‘ í mér.
Erfitt að útskýra það.
Og það er vonlegt að þér verði ekki um sel.
Sól, ég hef sögu að segja þér.
Sagan fór illa af stað,
en ég er viss um að hún endar nokkuð vel.

Það vildi þannig til
að þú varst hér og nú.
Ég leitaði mér skjóls.
Og skjólið, það varst þú.

Ég viðurkenni að víst
það virðist ótrúlegt
að hafa þvílík völd,
en geta lítið gert.

Finndu mig; ég er alveg eins og þú.
Snertu mig, ég er holdi klæddur.

viðlag

Ef til vill var það lán að lenda hér.
Illu heilli ég hafnaði hjá þér.
Sem betur fer.

viðlag

Þetta mun enda vel,
sagan mun enda vel.

[m.a. á plötunni Sálin hans Jóns míns – Annar máni]