Afmælisbörn 1. mars 2017

Kristinn Sigmundsson

Kristinn Sigmundsson

Í dag eru fjögur tónlistartengd afmælisbörn á skrá Glatkistunnar:

Árni Johnsen Vestmannaeyingur og fyrrverandi alþingismaður er sjötíu og þriggja ára gamall í dag. Hann var framarlega í þjóðlagasöngvaravakningunni um og upp úr 1970, m.a. í félagsskapnum Vikivaka og kom oft fram á samkomum því tengt. Hann var einnig hluti af Eyjaliðinu sem gaf út plötu til styrktar Vestmannaeyingum eftir gos, og hefur gefið út um tug sólóplatna, þá fyrstu 1971.

Kristinn Sigmundsson stórsöngvari er sextíu og sex ára en hann nam söngfræðin við Tónlistarskólann í Reykjavík undir handleiðslu Guðmundar Jónssonar áður en hann hélt til Austurríkis og Bandaríkjanna til framhaldsnáms. Kristinn hefur gefið út fjöldann allan af plötum og sungið á plötum óteljandi annarra listamanna.

Hreindís Ylva Garðarsdóttir söngkona er tuttugu og átta ára gömul en hún er þekktust fyrir að gefa út plötu með lögum sem Erla Þorsteins gerði vinsæl á árum áður en einnig hefur hún sungið í undankeppnum Eurovision hér heima. Hreindís Ylva vakti fyrst athygli þegar hún söng lag á plötu tengt danslagakeppni Sæluvikunnar á Sauðárkróki, þá tíu ára gömul.

Þá er Bogi Reynisson fjörutíu og eins árs gamall á þessum degi en hann hefur spilað á bassa í fjölmörgum hljómsveitum, þeirra á meðal eru sveitir eins og SSSpan, Sororicide, Bacon, Clockworking diabolus, Gor, Putrid, Rut+, Pulsan, Xerox og Stjörnukisi, svo nokkrar séu nefndar. Bogi hefur ennfremur starfað við upptökur á tónlist.