Tríó Steinþórs Steingrímssonar

Steinþór Steingrímsson píanóleikari var þrívegis með tríó á sinni könnu, þau voru ýmist kölluð Tríó Steinþórs Steingrímssonar eða Tríó Steina Steingríms.

Vorið 1953 lék tríó undir hans stjórn með breska trompetleikaranum Leslie Hutchinson sem hélt hér tónleika en auk Steinþórs voru Guðmundur Steingrímsson trommuleikari og Pétur Urbancic bassaleikari í tríóinu.

Steinþór mun einnig hafa starfrækt tríó veturinn 1971-72 en það skipuðu þeir áðurnefndur Guðmundur trommari, Árni Scheving bassaleikari og svo Steinþór.

Í þriðja sinn sem tríó í nafni Steinþórs starfaði var um að ræða sveit sem lék svokallaðan hádegisdjass á Hótel Loftleiðum en það var um nokkurra mánaða skeið árið 1983. Engar upplýsingar er að finna um meðlimi tríósins með honum en iðulega kom gestaleikari fram með sveitinni, meðal þeirra voru Árni Elfar píanóleikari, Gunnar Egilson klarinettuleikari og Björn R. Einarsson básúnuleikari.