Afmælisbörn 9. desember 2020

Björgvin Franz Gíslason

Tónlistartengdu afmælisbörn dagsins eru þrjú talsins að þessu sinni:

Björgvin Franz Gíslason leikari er fjörutíu og þriggja ára gamall í dag. Björgvin Franz var barnastjarna og vakti fyrst athygli fyrir söng sinn í Óla prik syrpu sem naut vinsælda fyrir margt löngu en hefur síðan aðallega verið tengdur leikhús- og barnatónlist, t.d. Benedikt búálfi, Stundinni okkar o.þ.h.

Hermann Gunnarsson (1946-2013) hefði einnig átt afmæli á þessum degi, þessi landsfrægi skemmtikraftur kom víða við á sínum ferli og var tónlistin einn þátturinn þar. Hann gaf út plötuna Frískur og fjörugur 1984 og söng á söngævintýraplötum Gylfa Ægissonar og plötum Áhafnarinnar á Halastjörnunni svo dæmi séu nefnd. Jólalag hans með Dengsa (Ladda) er einnig löngu orðið sígilt.

Raftónlistarmaðurinn Aðalsteinn Guðmundsson er fjörutíu og fjögurra ára gamall í dag. Aðalsteinn hefur gefið út tugi titla í rafrænu, snældu-, geisladiska- og vefformi hér heima og erlendis undir ýmsum nöfnum, ýmist einn eða í félagi við aðra. Þeirra á meðal má nefna Plastik, Yagya, Sanasol, Cosmonut, Rhythm of snow og margt fleira.

Vissir þú að Jens Hansson saxófónleikari Sálarinnar hans Jóns míns lék í fyrsta skipti á plötu árið 1984, þá lék hann sólókaflann í laginu Blindsker á plötu Das Kapital?