Afmælisbörn 7. ágúst 2021

Rannveig Jóhannsdóttir og Krummi

Í dag koma fjölmörg afmælisbörn við sögu Glatkistunnar:

Rannveig Jóhannsdóttir er sjötíu og tveggja ára gömul en margir hinna eldri muna eftir henni frá fyrstu árum Sjónvarpsins en hún sá þá um Stundina okkar ásamt hrafninum Krumma. Reyndar kom einnig út lítil plata með þeim Rannveigu og Krumma. Rannveig var lítið áberandi eftir þetta sjónvarpsævintýri en birtist reyndar löngu síðar aftur í Ríkissjónvarpinu með morgunsjónvarp fyrir börn.

Bassaleikarinn Hermann Jónsson er fimmtíu og tveggja ára gamall í dag. Hermann lék hér áður á bassa með fjölda hljómsveita og meðal þeirra má nefna sveitirnar Rauðir fletir, Orgill, Niður, Megakukl, Concert, Dýrlingarnir og Dýrið gengur laust.

Bergur Geirsson er fimmtíu og eins árs gamall í dag. Hann hefur leikið á bassa og önnur hljóðfæri með fjölda sveita s.s. Buff, Tríói Jóns Leifssonar, Saffó, Íslenska fánanum, Bítlunum og Hvatberum en hefur einnig gegnt umboðsmennsku, rótarastörfum og hljóðversstörfum í íslensku tónlistarlífi.

Katrín Helga Ólafsdóttir söngvari og hljómborðsleikari úr Hafnarfirði er tuttugu og fimm ára gömul í dag. Hún hefur gefið út tónlist undir sólóista-nafninu K. Óla en hefur einnig starfað með hljómsveitum eins og White signal, Milkhouse og Marvin straight.

Sigurður Ingimarsson

Tónlistarmaðurinn Siggi Ingimars frá Akureyri eða Sigurður Ingimarsson er fimmtíu og eins árs gamall í dag. Sigurður hefur mest verið viðloðandi kristilega tónlistargeirann en hefur einnig starfað með hljómsveitum á borð við Sigtrygg dyravörð, Nonna og Manna, Kredit, Dúótríóið og Nýja menn. Hann hefur einnig sent frá sér sólóefni og sungið á plötum annarra listamanna.

Skúli Gestsson bassaleikari Diktu á einnig afmæli í dag en hann er þrjátíu og átta níu ára gamall. Skúli, sem reyndar leikur bæði á bassa og hljómborð, hefur starfað með Diktu síðan sveitin var stofnuð 1997 og tók þátt í tvennum Músíktilraunum með sveitinni áður en fyrsta platan kom út. Síðan hafa komið út nokkrar plötur með sveitinni.

Þá á fyrsti trommuleikari Hljóma, Eggert (Valur) Kristinsson sjötíu og níu ára afmæli á þessum degi. Eggert sem er frá Keflavík lék með fjöldanum öllum af hljómsveitum þar í bæ, fyrst aðeins tólf ára með Hljómsveit Gagnfræðiskólans í Keflavík en síðan með sveitum eins og Saxon, Beatniks, Heiðursmönnum, Hljómsveit Guðmundar Ingólfssonar, Spútnik tríó, Capri tríó, Tíglum og Nátthröfnum svo nokkrar séu hér upp taldar.

Andrés Indriðason átti einnig þennan afmælisdag en hann lést árið 2020. Andrés, sem var fæddur 1941 kom að tónlist með margvíslegum hætti m.a. í gegnum Ríkissjónvarpið þar sem hann starfaði lengi vel, og skóp t.d. þá félaga Glám og Skrám. Andrés var gítarleikari í nokkrum hljómsveitum á yngri árum s.s. Flamengo kvintettnum og JJ Quintet og kom einnig að plötuútgáfu um tíma en hann var einn af stofnendum Hljómplötuútgáfunnar.

Að síðustu er hér nefndur tónlistarmaðurinn Valdimar Guðmundsson eða bara Valdimar en hann er þrjátíu og sex ára gamall í dag. Valdimar sem er söngvari og básúnuleikari hljómsveitarinnar Valdimar hefur sungið ógrynni stórsmella með sveit sinni en hann hefur einnig verið í sveitum eins og Streng, Gosum og Eldum og sungið og leikið á plötum annarra listamanna eins og Snorra Helgasonar, Bubba Morthens, Helga Júlíusar Óskarssonar og margra annarra.

Vissir þú að þegar tónlistarmaðurinn José Riba tók upp íslenskt nafn skv. lögum hér á landi kallaði hann sig Ólaf Jósef Pétursson?