Afmælisbörn 28. nóvember 2021

Janis Carol

Þrjú afmælisbörn í tónlistargeiranum koma við sögu Glatkistunnar að þessum sinni:

Páll Jóhannesson einsöngvari og bóndi frá Þverá í Öxnadal er sjötíu og eins árs gamall í dag, hann nam söng á Ítalíu á sínum tíma og gaf út tvær einsöngsplötur á níunda áratug síðustu aldar þar sem hann naut m.a. aðstoðar Karlakórsins Geysis og Karlakórs Akureyrar.

Þá á söngkonan Janis Carol Walker (Carol Nielsson) sjötíu og þriggja ára afmæli í dag. Janis var áberandi í íslensku tónlistarlífi um og upp úr 1970 þegar hún söng með hljómsveitum á borð við Mods og Töturum en áður hafði hún sungið með danshljómsveitum eins og Hljómsveit Guðjóns Pálssonar og Ó.B. kvartett. Janis hvarf síðan af landi brott og var nokkuð áberandi í breska söngleikjaheiminum um tíma en hefur mest alið manninn í Bandaríkjunum hin síðari ár. Janis hefur gefið út tvær tveggja laga plötur og eina breiðskífu, auk þess að syngja inn á nokkrar aðrar plötur.

Og að síðustu er hér nefndur Hilmar Sverrisson frá Sauðárkróki en hann er sextíu og fimm ára á þessum degi. Fáir hafa líklega leikið með jafn mörgum ballhljómsveitum og Hilmar um ævina, þekktust þeirra er Hljómsveit Geirmundar Valtýssonar en hér má nefna fáeinar eins og Föruneyti Gísla Helgasonar, Goðgá, Hljómsveit Ragnar Bjarnasonar, Víkingarnir, Danshljómsveit Vilhjálms Guðjónssonar, Fræ, Háspenna, MAO, Pólland, Norðan 3, Í gegnum tíðina og þannig mætti áfram telja.

Vissir þú að þingmaðurinn Logi Einarsson var einn meðlima Skriðjökla í gamla daga en hann var þar dansari?