Skólahljómsveitir Gagnfræðaskóla Austurbæjar (1949-65)

Líkt og við marga af gagnfræðaskólum landsins voru á sínum tíma starfandi skólahljómsveitir við Gagnfræðaskóla Austurbæjar (sem einnig var kallaður Ingimarsskóli eftir fyrsta skólastjóranum) en skólinn starfaði undir því nafni til ársins 1974 en hann hafði verið stofnaður 1918 og gekk fyrst undir nöfnunum Ungmennaskóli Íslands og Gagnfræðaskóli Reykjavíkur áður en Austurbæjarnafnið kom til sögunnar.

Elstu heimildir um hljómsveit við skólann eru frá vetrinum 1949-50 en þá var þar starfandi hljómsveit þeirra Ragnars Bjarnason trommuleikara (síðar söngvara), Sigurðar H. Guðmundssonar harmonikkuleikara, Karls Lilliendahl gítarleikara, Agnars Einarssonar [?] og Andrésar Ingólfssonar klarinettuleikara sem lék á árshátíð og öðrum skemmtunum innan skólans, hluti þeirrar sveitar átti síðar eftir að starfa undir nafninu RDS-tríóið.

Næst liggja fyrir upplýsingar um hljómsveit sem starfaði við skólann á síðari hluta sjötta áratugarins, líklega í kringum 1956-58 – í þeirri sveit var meðal annarra harmonikkuleikarinn Júlíus Sigurðsson en ekki er vitað hverjir aðrir skipuðu sveitina þá. Þá var skólahljómsveit starfandi við skólann á fyrri hluta sjöunda áratugarins (líklega þó nær 1965 en 1960) sem hafði að geyma Björgvin Gíslason gítarleikara en upplýsingar um aðra er ekki að finna.

Vafalaust hafa oftar en ekki verið skólahljómsveitir við skólann og er hér með auglýst eftir upplýsingum um þær.