Afmælisbörn 8. desember 2022

Guðni Finnsson

Á þessum degi eru afmælisbörn Glatkistunnar fjögur talsins:

Guðni (Þórarinn) Finnsson bassaleikari Ensímis er fimmtíu og tveggja ára gamall í dag. Auk þess að vera bassaleikari í Ensími hefur Guðni leikið með hljómsveitum eins og Áhöfninni á Húna II, Bikarmeisturunum, Dr. Spock, Rass, Pondus, Hispurslausa kvartettnum og mörgum fleirum. Guðni hefur meira að segja farið sem einn af fulltrúum Íslands í Eurovision keppnina þegar hann var í Pollapönks-liðinu.

Rúnar Örn Friðriksson er fimmtíu og fjögurra ára gamall á þessum degi. Rúnar Örn söng með hljómsveitinni Sixties sem gaf út fjölmargar plötur en hann hefur einnig sungið með sveitum eins og Jötunuxum, U3 project, Fullu tungli, Kinkí, Flower power og Drykkjum innbyrðis.

Bassaleikarinn og fyrrverandi borgarfulltrúinn S. Björn Blöndal er fimmtíu og þriggja ára í dag, hann er kunnastur fyrir spilamennsku í hljómsveitinni Ham en hefur einnig starfað með sveitum eins og Funkstraβe, Gáfnaljósunum, Drullu og Rass, með síðast töldu sveitinni var hann reyndar gítarleikari.

Tónlistarmaðurinn Einar Örn Jónsson frá Blönduósi er fjörutíu og sjö ára gamall í dag. Einar Örn sem fyrst vakti athygli með hljómsveitinni Sónötu sem gaf út plötu með lagasmíðum hans, varð síðar hljómborðsleikari með hljómsveitinni Í svörtum fötum sem gerði garðinn frægan um og upp úr aldamótum en lék síðar með Veðurguðunum, Löðri og fleiri sveitum, og hefur leikið inn á fjölda platna.

Rafn Jónsson (Rabbi) trommuleikari, lagahöfundur, plötuútgefandi og margt annað, hefði líka átt afmæli þennan dag en hann lést 2004 úr MND sjúkdómnum. Rabbi (fæddur 1954) lék með ógrynni hljómsveita á sínum ferli en þekktustu sveitir sem hann lék með voru Sálin hans Jóns míns, Bítlavinafélagið, Grafík, Ýr og Haukar. Rabbi gaf einnig út nokkrar sólóplötur og plötur í félagi við aðra, þar sem fjölmörg lög hans nutu vinsælda.

Vissir þú að tvö íslensk ljóð eru til við Stille Nacht, annars vegar ljóð Sveinbjörns Egilssonar (Heims um ból) og hins vegar þýðing Matthíasar Jochumssonar (Hljóða nótt, heilaga nótt)?