Þ.Ó. kvintett

Básúnuleikarinn Þórarinn Óskarsson starfrækti fjölda hljómsveita um ævi sína en þær störfuðu á tímabili sem spannar um fjóra áratugi – þó með mörgum og mislöngum hléum.

Fyrsta sveit Þórarins, Þ.Ó. kvintettinn (eða ÞÓ kvintett) starfaði í byrjun sjötta áratugarins en var stofnuð sumarið 1950, meðlimir hennar í upphafi voru líklega auk Þórarins sjálfs þeir Guðni Guðnason harmonikku- og trommuleikari, Höskuldur Þórhallsson trommu- og trompetleikari, Bragi Einarsson saxófón- og klarinettuleikari og Árni Ísleifsson píanóleikari. Snemma árs 1951 höfðu Guðmundur Norðdahl [?], Sigurgeir Björgvinsson trommuleikari og Magnús Pétursson píanóleikari tekið sæti þeirra Guðna, Braga og Árna. Karl Lilliendahl gítarleikari lék einnig með sveitinni um tíma, þá söng Jón Þorgilsson frá Vestmannaeyjum með sveitinni sumarið 1951. Heimildir eru um að sveitin hafi leikið á dansleik í ungmennafélagshúsinu á Grímsstaðaholtinu en mest lék sveitin í Listmannaskálanum við Kirkjustræti, þar var sveitin m.a. ráðin til að leika veturinn 1951-52 og þá var Ágúst Elíasson trompetleikari kominn í hana en Sigurgeir, Guðni og Árni voru þá aftur liðsmenn hennar auk Þórarins hljómsveitarstjóra. Pétur Urbancic leysti Guðna af hólmi um haustið 1951.

Líklega hafði Þórarinn stofnað nýja sveit árið 1952 en það ár lék sveitin nokkuð í Alþýðuhúsinu í Hafnarfirði og hafði þá reyndar tekið heilmiklum stakkaskiptum, hún gekk þá reyndar einnig undir nafninu Dixielandhljómsveit Þórarins Óskarssonar og lék m.a. á stórri djasshátíð á því ári. Meðlimir sveitarinnar voru þarna Ágúst trompetleikari, Árni píanóleikari og Þórarinn básúnuleikari úr gömlu sveitinni en nýir liðsmenn voru Helgi Ingimundarson saxófónleikari, Sveinn Jóhannsson trommuleikari, Kristján Hjálmarsson klarinettu- og básúnuleikari, Magnús Sigurjónsson túbuleikari og Haraldur Guðmundsson banjóleikari, og var sveitin því orðin átta manna.

Dixielandshljómsveit Þórarins Óskarssonar

Svo virðist sem Þórarinn hafi starfrækt þessa (dixieland) hljómsveit sína til 1954, hún lék víða um höfuðborgarsvæðið og landsbyggðina og hér má nefna Þórscafe, Hótel Akranes, í Keflavík og víðar, og söng Ragnar Bjarnason með henni um tíma en ekki liggja fyrir frekari upplýsingar um mannabreytingar á henni. Sveitin lék jafnframt margoft í Ríkisútvarpinu.

Um áratugur leið þar til næst spurðist til hljómsveitar í nafni Þórarins Óskarssonar, það var árið 1965 en þá lék djasshljómsveit í hans nafni á djasskvöldum um vorið – þá sveit skipuðu með Þórarni þeir Friðrik Theódórsson bassaleikari, Guðmundur Steingrímsson trommuleikari og Örn Ármannsson gítarleikari. Árið 1968 var Þórarinn svo með sveit í Leikhúskjallaranum um hríð, ekki liggja fyrir neinar upplýsingar um skipan eða stærð þeirrar sveitar aðrar en að Marta Bjarnadóttir söng með henni.

Um tveir áratugir voru í næstu hljómsveit Þórarins sem heimildir eru um, það var dixilandhljómsveit sem lék á Hótel Stykkishólmi árið 1988 og ári síðar lék sú sveit á djasshátíðinni á Egilsstöðum, sumarið 1989 – engar upplýsingar er að finna um skipan þeirrar sveitar og er óskað eftir frekari upplýsingum um hana og þær sveitir sem vantar upp á hér að ofan.