Afmælisbörn 11. ágúst 2015

Bragi Ólafsson

Bragi Ólafsson

Afmælisbörn úr fórum Glatkistunnar eru fjögur talsins að þessu sinni:

Bragi Ólafsson bassaleikari og rithöfundur er fimmtíu og þriggja ára. Upphaf ferils Braga á tónlistarsviðinu miðast við pönkið en hann var bassaleikari Purrks Pillnikk og síðan nokkurra náskyldra hljómsveita s.s. Pakk, Stuðventla, Brainer, Amen, Bacchus og P.P. djöfuls ég, áður en hann gekk til liðs við Sykurmolanna sem varð hans síðasta sveit áður en hann einbeitti sér að rithöfundarferli sínum.

Einar Bragi Bragason saxófónleikari er fimmtugur en hann hefur starfað með ótal hljómsveitum og tónlistarmönnum í gegnum tíðina, frægust þeirra er án efa Stjórnin en einnig má nefna Sumargleðina, Hljómsveit Hauks Morthens, Afsakið, Þáþrá og Babadú svo einungis örfáar séu nefndar. Einar Bragi starfaði lengi sem skólastjóri Tónlistarskólans á Seyðisfirði en gegnir nú sama starfi á Vopnafirði. Hann hefur gefið út sólóefni.

Karin Sveinsdóttir söngkona dúettsins Young Karin er nítján ára í dag. Young Karin sem hefur vakið nokkra athygli hefur starfað á annað ár en dúettinn gekk upphaflega undir nafninu Highlands.

Ólafur Gaukur Þórhallsson tónlistarmaður átti einnig afmæli á þessum degi en hann lést 2011. Ólafur Gaukur (f. 1930) var kunnur gítarleikari, starfaði í og starfrækti fjöldann allan af hljómsveitum, auk þess að semja tónlist og texta, útsetja og annast upptökur. Hann starfrækti ennfremur gítarskóla og plötuútgáfu. Ólafur Gaukur hlaut heiðursverðlaun Íslensku tónlistarverðlaunanna 2007.