Siggi Jóns

Siggi Jóns
(Lag / texti: erlent lag / Jónas Friðrik Guðnason)

Hann Siggi Jóns í sorgum stórum lenti,
en Siggi Jóns er góður vinur minn,
er Gunna Spíra hringunum í hann henti
og hljópst á brott og fór í kaupstaðinn.

Hann Siggi Jóns í sorgum þessum frægum
nú sagðist kveðja vilja fánýtt spil
og komast þegar yfir englavængi
og upp með söngvum fljúga himins til.

Við hinir skildum aldrei angur þetta
og engan skaða töldum Gunnu að.
En okkar tilraun angur hans að létta
að engu kom og búið spil með það.

Og Siggi Jóns fór eitt kvöld í kolamyrkri
og komst í fjósið eftir leynistig
og brölti upp á bita yfir flórnum
og batt þar reipi fast og hengdi sig.

En Siggi Jóns var seinheppinn svo af bar
því Siggi reipi stal frá Kalla Páls,
sem Kalli stal frá Gvendi grút í fyrra
og grútarreipið þoldi ei Sigga háls

né líkamann og leið því bara sundur
sem lopi væri það og Siggi hraut
í flórinn beint, þó fallið væri ei mikið
var fallið illt og lendingin var blaut.

En ástarsorgin sökk í flórinn niður
og Siggi öllum tárum hafði gleymt.
Svo þessa aðferð afhendi ég yður
sem út af slíku sjálfsmorð hafið reynt.

[m.a. á plötunni Ríó tríó – Verst af öllu]