Úr vasahandbók piparsveinsins

Úr vasahandbók piparsveinsins
(Lag / texti: erlent lag /Jónas Friðrik Guðnason)

Vanti þig konu og viljirðu ráð
þess vitra í alvöru heyra,
þá hef ég á bréfsnifsi heilræði skráð
um háralit kvenna og fleira.

Heyra, fleira,
heilræði skráð, heilræði skráð,
þá hef ég á bréfsnifsi heilræði skráð
um háralit kvenna og fleira.

Ef svarthærða eignast þá undrar ei mig
þó indælt sé brjóstið og maginn,
að setja’ hún í rúminu rassinn í þig
og ræni af þér veskinu á daginn.

Maginn, daginn,
rassinn í þig, rassinn í þig,
setja’ hún í rúminu rassinn í þig
og ræni af þér veskinu á daginn.

Þær ljósu oss heilla en lítum með sann
á leyndardóm traustustu raka,
þær elska jú gjarnan  hvern einhleypan mann
en ekki sinn löglega maka.

Raka, maka,
einhleypan mann, einhleypan mann,
þær elska jú gjarnan  hvern einhleypan mann
en ekki sinn löglega maka.

Þær rauðhærðu eiga sitt ólgandi blóð
og ástina heita þér sverja
en skapið er eimyrju ólgandi glóð
og eiginmenn sína þær berja.

Sverja, berja
ólgandi glóð, ólgandi glóð,
skapið er eimyrju ólgandi glóð
og eiginmenn sína þær berja.

En láttu ei hugfallast, loks kemur sú
sem ljá mun þér tryggð sína alla,
og fer ekki brott, verður falslaus og trú,
já, fáðu þér konu með skalla.

Alla, skalla
falslaus og trú, falslaus og trú,
já, fáðu þér konu með skalla.

[m.a. á plötunni Ríó tríó – Sittlítið af hvurju]