Afmælisbörn 8. október 2017

Ólafur Stolzenwald

Afmælisbörnin eru fjögur að þessu sinni:

Ingimar Oddsson söngvari hljómsveitarinnar Jójó frá Skagaströnd er fjörutíu og níu ára gamall. Jójó sigraði Músíktilraunir Tónabæjar árið 1988 en náði ekki sömu hæðum og margir sigurvegarar keppninnar fyrr og síðar hafa náð. Ingimar var viðloðandi fleiri hljómsveitir en þær vöktu litla athygli, þetta voru verkefni eins og Lærisveinar Fagins, Arctica og Reykjavíkurkvintettinn en einnig Rocky sem var forveri Jójós.

Þá á Ólafur Stolzenwald bassaleikari afmæli í dag en hann er fimmtíu og sex ára gamall. Ólafur er kunnur kontrabassaleikari í djassheiminum og hefur starfrækt ótal tríó og kvartetta en hefur einnig starfað með sveitum eins og Póstberunum, Q, Sunnan sex og Hljóð í skrokkinn. Hann tók þátt í öðrum Músíktilraununum sem haldnar voru haustið 1983, með hljómsveitinni Byl.

Ólafur Beinteinsson (1911-2008) átti einnig afmæli á þessum degi en hann söng með Kling klang kvintettnum og Blástakkatríóinu og lék ennfremur stundum á gítar undir leik síðarnefnda tríósins. Ólafur kom fram í einhver skipti með Hljómsveit Bjarna Böðvarssonar og með Sveinbirni Þorsteinssyni en saman mynduðu þeir líklega fyrsta þjóðlagadúett Íslandssögunnar.

Jakob Hafstein söngvari, ljóð- og tónskáld (1914-82) hefði líka átt þennan afmælisdag en hann var einn meðlima MA-kvartettsins sem starfræktur var í Menntaskólanum á Akureyri við miklar vinsældir fyrir margt löngu og gaf út fjölmargar 78 snúninga plötur. Hann söng einnig inn á nokkrar aðrar plötur á fimmta áratugnum, ýmist einn eða með Ágústi Bjarnasyni