Í dag

Í dag
(Lag / texti: Sigfús Halldórsson / Sigurður Sigurðsson frá Arnarholti)

Í dag er ég ríkur, í dag vil ég gefa
demanta, perlur og skínandi gull.
Gakk þú í sjóðinn og sæktu þér hnefa,
uns sál þín er mettuð og barmafull.
Það er ókeypis allt,
og með ánægju falt,
og ekkert að þakka, því gullið er valt!

Í dag er ég glaður, í dag vil ég syngja
og dansa til morguns við hverja sem er.
Við flakkarann allt eins og kón vil ég klingja,
ég kæri mig ekkert um nafnið á þér.
Þú ert vinur minn víst
eins og veröldin snýst,
á víxla ég skrifa nú eins og þér líst.

Í dag er ég reiður, í dag vil ég brjóta,
drepa og brenna hér allt niðr‘ í svörð;
hengja og skjóta‘ alla helvítis þrjóta,
hræki nú skýin á sökkvandi jörð!
Farðu‘ í heitasta hel!
Skaki hörmungaél
hnöttinn af brautinni, og þá er vel!

Í dag er ég gamall, í dag er ég þreyttur,
drjúpi nú yfir tæmdum sjóð.
Hvar er nú skap og hnefinn steyttur?
Hvar er nú öll mín forna glóð?
Vertu sæll! Ég er sár,
og mitt silfraða hár
í særokum litaðist hvítt fyrir ár.

[m.a. á plötunni Karlakórinn Vísir – Okkar glaða söngvamál]

Auglýsingar