Blístró (1998-2000)

Ljósbrot – Jóhann og Haffi Tempó

Ballhljómsveitin Blístró frá Grindavík fór mikinn á sveitaballamarkaðnum í kringum aldamótin en verður einna helst minnst fyrir að haldast illa á nafni.

Sveitin virðist hafa verið stofnuð árið 1998 og gekk hún fyrstu misserin undir nafninu Blístrandi æðarkollur en síðsumars 1999 tóku þeir upp nýtt nafn eða öllu heldur styttingu á gamla nafninu og hétu þá Blístró. Fáeinum mánuðum síðar (í febrúar 2000) auglýstu þeir nýtt nafn á sveitinni, Ljósbrot en það var aðeins um nokkurra vikna skeið, þá tóku þeir Blístró nafnið upp aftur og notuðu það þar til um sumarið en þá virðist sveitin hafa lagt upp laupana.

Meðlimir sveitarinnar voru þeir Hafþór Karlsson (Haffi Tempó) bassaleikari, Júlíus Daníelsson söngvari (sem hafði gert garðinn frægan með Rokklingunum), Óðinn Arnberg gítarleikari og söngvari, Grétar Lárus Matthíasson gítarleikari og Ingólfur Arnar Þorvaldsson trommuleikari.

Um tíma var Grétar gítarleikari frá vegna meiðsla og til að fylla skarð hans gekk Jóhann Vignir Gunnarsson hljómborðsleikari til liðs við sveitina. Af þeim sökum tók sveitin upp nafnið Ljósbrot tímabundið.