Afmælisbörn 8. maí 2019

Ellen Kristjánsdóttir

Sex afmælisbörn í tónlistarsögu Íslands eru í gagnagrunni Glatkistunnar að þessu sinni:

Ari Jónsson söngvari og trommuleikari er sextíu og níu ára gamall í dag. Auk þess að hafa gefið út sólóplötur og sungið á plötum ýmissa annarra listamanna, hefur Ari sungið og leikið með hljómsveitum á borð við Roof tops, Ómum, Altó, Borgís, Pónik, Sheriff, Ríó tríó, Cabarett og Hljómsveit Stefáns P.

Bergur Jón Þórðarson (Bergur Thorberg) er sextíu og átta ára gamall í dag en hann var m.a. í hljómsveitinni Tíglum sem starfaði á Skagaströnd fyrir mörgum áratugum. Hann gaf út sólóplötuna Metsöluplata sem kom út 1989, á henni var að finna frumsamið efni. Bergur hefur einnig starfað við myndlist og eru myndir hans, málaðar með kaffi, vel þekktar.

Valgeir Skagfjörð er sextíu og þriggja ára gamall á þessum degi. Valgeir er laga- og textahöfundur, auk þess að hafa sungið og leikið á hljómborð í hljómsveitum eins og Haukum, Óla Fink, Tíbrá, Cabarett og Hafrót. Valgeir hefur sem tónskáld verið tíður gestur í undankeppnum Eurovision keppninnar, Söngvakeppni Sjónvarpsins.

Hjaltdælingurinn Jens Kr. Guð (eða Jens Kristján Guðmundsson) er einnig sextíu og þriggja ára á þessum degi en hann er þekktur poppfræðingur, hefur bæði haldið úti tónlistartengdri bloggsíðu og ritað um tónlist í gegnum tíðina í blöð og tímarit eins og Þjóðviljann og Æskuna svo fáein séu hér nefnd, hann skrifaði ennfremur bókina Poppbókin – í fyrsta sæti, sem kom út 1983. Jens var í hljómsveitinni Frostmark hér áður og sjálfsagt fleiri sveitum, og er einnig kunnur fyrir drátthægni og skrautskrift.

Ellen (Rósalind) Kristjánsdóttir söngkona er sextug og á því stórafmæli í dag. Ellen hefur, auk þess að hafa gefið út sex sólóplötur, sungið á plötum margra annarra tónlistarmanna. Hún hefur einnig starfað með bróður sínum KK og sungið gríðarlega mörg vinsæl lög með hljómsveitum eins og Ljósunum í bænum, Borgardætrum, Tívolí, Mannakornum, Póker og Kombóinu sem dæmi séu tekin.

Lizzie Þórarinsson sópransöngkona og bóndakona í Suður-Þingeyjasýslu (f. 1875) hefði átt afmæli á þessum degi en hún var fyrst kvenna til að syngja á plötu hérlendis. Lizzie var skosk en fluttist til Íslands þegar hún kynntist verðandi eiginmanni sínum. Hún lést 1962.