Afmælisbörn 2. nóvember 2020

Gunnar Ó. Kvaran

Í dag eru afmælisbörn á skrá Glatkistunnar átta talsins:

Troels Bendtsen er sjötíu og sjö ára í dag. Troels var einkum þekktur fyrir framlag sitt í Savanna tríóinu og Þremur á palli en báðar sveitirnar nutu vinsælda á sjöunda áratugnum, síðarnefnda sveitin starfaði einkum í nánu samstarfi við Jónas Árnason og leikhúsið en allir þekkja lög með sveitunum.

Bergur Ebbi Benediktsson tónlistarmaður, uppistandari, rithöfundur og lögfræðingur er þrjátíu og níu ára gamall. Hann var söngvari og gítarleikari í Sprengjuhöllinni sem margir muna eftir frá því um fyrir nokkrum árum síðan. Sú sveit gaf út tvær plötur sem nutu báðar vinsælda.

Viktor Orri Árnason fiðlu- og bassaleikari er þrjátíu og þriggja ára gamall í dag. Viktor Orri vakti fyrst athygli með Búdrýgindum sem sigraði Músíktilraunir árið 2002 en hann var þá á fimmtánda ári. Síðar var hann í hljómsveitinni Hjaltalín sem enn er starfandi, og hefur aukinheldur starfað með ýmsum tónlistarmönnum og hljómsveitum.

Hip hop tónlistarmaðurinn Kristinn Óli Sigrúnarson Haraldsson eða bara Króli er tuttugu og eins árs gamall í dag en hann er auðvitað helmingur dúósins JóiP & Króli sem hefur sent frá sér nokkrar plötur og einnig stórsmelli á borð við B.O.B.A, Í átt að tunglinu, Þráhyggja og Óska mér. Eins og aðrir rapparar hefur hann unnið með fjölda annarra slíkra tónlistarmanna við ólík verkefni.

Gunnþór Sigurðsson bassaleikari á stórafmæli dagsins en hann er sextugur á þessum degi. Gunnþór er af miklum söngvaraættum en hefur lítið haft sig frammi sem söngvari, hann fór hins vegar mikinn sem bassaleikari á pönktímabilinu um og upp úr 1980 og lék þá með sveitum eins og Q4U og Baðvörðunum en síðar í böndum eins og Most, Vin K, Bulldosers og Dýrið gengu laust.

Hannes Jón Hannesson söngvari og gítarleikari er sjötíu og tveggja ára gamall en hann kom víða við á sínum tónlistarferli og var hvað mest áberandi á áttunda áratug síðustu aldar. Eftir Hannes Jón liggja tvær breiðskífur og ein afar umdeild smáskífa (sem kom út 1971) en hann var jafnframt í sveitum eins og Brimkló, Experiment, Fiðrildum, Næturgölum, Sólskini og Hálfu í hvoru. Hann hefur einnig leikið inn á nokkrar plötur og má þar t.d nefna plötu Smjattpattanna frá 1984.

Jón Halldórsson kórstjórnandi hefði einnig átt afmæli þennan dag en hann lést 1984. Jón (f. 1889) var kunnastur fyrir að stjórna Karlakór K.F.U.M. (síðar Fóstbræðrum) en þeim kór stjórnaði hann í þrjátíu og fjögur ár. Jón stjórnaði líka Landskórinu sem sett var á fót fyrir Alþingishátíðina 1930 auk fleiri kóra en hann söng einnig sjálfur í nokkrum kórum og söngfélögum.

Og að lokum er hér nefndur harmonikkuleikarinn Gunnar Ó. Kvaran sem er sjötíu og fjögurra ára gamall í dag. Gunnar lék með fjölda hljómsveita hér áður fyrr á hljómborð, harmonikku og fleira en hann hefur einnig sent frá sér tvær plötur með frumsömdu efni, hann hefur einnig verið framarlega í félagsstörfum í harmonikkusamfélaginu og m.a. gegnt formennsku í Sambandi íslenskra harmonikuunnenda.